රිමාන්ඩ් රැඳවියන්ට ඡන්දය දිමට අවස්ථාවක්?

රිමාන්ඩ් භාරයේ සිටින රැඳවියන්ට මැතිවරණවලදී ඡන්දය ප්‍රකාශය කිරීමට අවස්ථාව සලසාදීමේ වැඩ පිළිවෙලක් සකස් කිරීමට ඇති හැකියාව පිළිබඳව කරුණු අධ්‍යයනය කරමින් සිටින බව නීතිපතිවරයා ශ්‍රේෂ්ඨාධිකරණයට අද (05) දැනුම් දුන්නේය.

රිමාන්ඩ් භාරයේ සිටින රඳවියන්ට මැතිවරණවලදී ඡන්දය ප්‍රකාශ කිරීමට අවශ්‍ය වැඩපිළිවෙලක් සහ මාර්ගෝපදේශ මාලාවක් සකස් කිරීමට මැතිවරණ කොමිසම ඇතුළු බලධාරීන්ට නියෝගයක් නිකුත් කරන්නැයි ඉල්ලා හිටපු සිරකරුවකු වන සුදේශ් නන්දිමාල් ද සිල්වා මහතා ගොනුකළ පෙත්සම කැඳවු  අවස්ථාවේදී නීතිපතිවරයා වෙනුවෙන් පෙනී සිටි ජ්‍යෙෂ්ඨ රජයේ නීතිඥ සජිත් බණ්ඩාර මහතා ඒ බව දැනුම් දුන්නේය.

ශ්‍රේෂ්ඨාධිකරණ විනිසුරුවරුන් වන පිලිප් නවාස්, අචල වෙන්ගප්පුලි  සහ මේනකා විජේසුන්දර යන මහත්ම මහත්මීන්ගෙන් සැදුම්ලත් විනිසුරු මඩුල්ලක් හමුවේ පෙත්සම සලකා බැලණි.

පෙත්සම කැඳවූ අවස්ථාවේදී පෙත්සම්කාර පාර්ශ්වය වෙනුවෙන් පෙනී සිටි නීතිඥ ලක්ෂාන් ඩයස් මහතා කරුණු දක්වමින් සිරකරුවන්ට ඡන්දය ප්‍රකාශය කිරීමට මේ වන විට රටවල් 66 ක පමණ අවස්ථාව සලසා දී ඇතැයි කීය.

අප රටේ සිරකරුවන්ටද එම අයිතිවාසිකම ලබා දිය යුතු බවට ශ්‍රී ලංකා මානව හිමිකම් කොමිසම විසින් නිරීක්ෂණ ඉදිරිපත් කර ඇතැයිද කී නීතිඥ ලක්ෂාන් ඩයස් මහතා මැතිවරණ කොමිසමද ඊට විරුද්ධත්වයක් දක්වා නැතැයි පෙන්වා දුන්නේය.

නීතිපතිවරයා වෙනුවෙන් පෙනී සිටි ජේෂ්ඨ රජයේ නීතිඥ සජිත් බණ්ඩාර මහතා කරුණු දක්වමින් සිරකරුවන්ට ඡන්දය ප්‍රකාශ කිරීමට අවස්ථාව සලසා දීමේදී ප්‍රායෝගික ගැටලු කිහිපයක් මතු විය හැකි යැයි සඳහන් කළේය.

නිදහස් හා සාධාරණ මැතිවරණයක් පැවැත්වීමට ආණ්ඩුක්‍රම ව්‍යවස්ථාව අනුව මැතිවරණ කොමිසම බැඳී සිටින නමුත් බන්ධනාගාරයක් තුළ නිදහස් හා සාධාරණ මැතිවරණයක් පැවැත්වීමේදී ප්‍රායෝගික ගැටලු මතුවිය හැකි බව පෙන්වා දුන් ජේෂ්ඨ රජයේ නීතිඥ සජිත් බණ්ඩාර මහතා මේ හේතුවෙන් බොහොමයක් රටවල් සිරකරුවන්ට එම අයිතිවාසිකම ලබාදීමට කටයුතු කර නොමැති බවද පෙන්වා දුන්නේය.

කෙසේ වෙතත් මේ වන විට සකස් වෙමින් පවතින නව මැතිවරණ නීතිය යටතේ විශේෂිත ඡන්ද මධ්‍යස්ථාන පිහිටුවීමට යෝජනා කර ඇති බවත් ඒ යටතේ බන්ධනාගාර තුළ ඡන්ද මධ්‍යස්ථාන ස්ථාපිත කිරීම සම්බන්ධයෙන් අවධානය යොමු වී ඇති බවත් පෙන්වා දුන් රජයේ නීතිඥවරයා ඊට අමතරව සිරකරුවන්ට ඡන්දය ප්‍රකාශ කිරීමට අවස්ථාව සලසා දීමේ වැඩපිළිවෙළක් සකස් කිරීම සම්බන්ධයෙන් මැතිවරණ කොමිසම හා බන්ධනාගාර දෙපාර්තමේන්තුව විසින්ද කරුණු අධ්‍යයනය කරමින් සිටින්නේ යැයිද කීය.

එබැවින් මෙම කටයුතුවල ප්‍රගතිය දැනුම්දීම සඳහා මාස හයක කාලයක් ලබා දෙන්නැයි ජ්‍යෙෂ්ඨ රජයේ නීතිඥවරයා අධිකරණයෙන් ඉල්ලීමක්ද කළේය.
පැෆරල් සංවිධානය වෙනුවෙන් පෙනී සිටි නීතිඥවරයා කරුණු දක්වමින් සිරකරුවන්ට ඡන්ද අයිතිවාසිකම දීම සම්බන්ධයෙන් තම සේවාදායකයාද අධ්‍යයනයක් කර ඇති බවත් ඊට අදාළ වාර්තා ඔවුන් මැතිවරණ කොමිසමට ඉදිරිපත් කර ඇතැයි කීය.
ඉදිරිපත් වූ කරුණු සලකා බැලීමෙන් අනතුරුව පෙත්සම අගෝස්තු 28 වැනිදා කැඳවීමට නියෝග කළ ශ්‍රේෂ්ඨාධිකරණය මෙම කටයුතුවල ප්‍රගතිය එදින අධිකරණයට දැනුම් දෙන ලෙස නීතීතිවරයාට නියම කළේය.

සචිත්‍ර ගුණසේකර