මෙවර ශ්‍රීපාද වන්දනා සමයේදී කැළි කසල කිලෝ ලක්ෂයක් ඉවත් කරයි

මෙවර අවසන් වූ ශ්‍රීපාද වන්දනා සමයේ මාස 06 ක කාලය තුළ ශ්‍රීපාද වන්දනා කරුවන් විසින් නල්ලතන්නිය-ශ්‍රීපාද මාර්ගයේ පරිසරයට හා ශ්‍රීපාද රක්ෂිතයට බැහැර කර තිබූ දිරා නොයන ඝණ අපද්‍රව්‍ය ඇතුළු කැළි කසල කිලෝ ලක්ෂයකට ආසන්න ප්‍රමාණයක් මස්කෙළිය ප්‍රාදේශිය සභාවේ පරිසර අංශය මගින් ඉවත් කළ බව එම ප්‍රාදේශිය සභාවේ පරිසර නිලධාරිණී රසිකා සමරණායක මහත්මිය පැවසුවාය.

ගෙවුණු වන්දනා සමය 2023 දෙසැම්බර් මාසයේ සිට 2024 මැයි මස වෙසක් පුන් පෝය දින දක්වා පැවැත්විණි.

ඉවත් කරන ලද කැළි කසල තොගයට දිරණ කසල කිලෝ 60,000 ක්, නොදිරණ කසල කිලෝ 36,000 ක් හා ප්ලාස්ටික් බෝතල් කිලෝ 3000 ක් අයත් වූ බව පරිසර නිලධාරිණී රසිකා සමරණායක සහත්මිය පැවසුවාය.

නල්ලතන්නිය රිකාටන් ප්‍රදේශයේ පිහිටි මස්කෙළිය ප්‍රාදේශිය සභාවට යටතේ ඇති කසල ප්‍රතිචක්‍රීයකරණ මධ්‍යස්ථානය වෙත මෙම දිරණ හා නොදිරණ කසල තොගය ගෙනවිත් එම ස්ථානයේදී ප්‍රතිචක්‍රීයකරණ ක්‍රියාවලිය සිදු කරන බවමස්කෙළිය ප්‍රාදේශිය සභාවේ ලේකම් ආර්.රාජවීරන් මහතා පැවසීය. 

මස්කෙළිය ගාමිණී