මිනිස් පරිභෝජනයට නුසුදුසු තිරිඟු පිටි ටොන් 750ක් අල්ලයි

මනුෂ්‍ය පරිභෝජනයට නුසුදුසු ආනයනික තිරිගු පිටි ටොන් 750 ක් සහිත අසුරන 30000 ක් වත්තල , උස්වැටකෙයියාව ප්‍රරදේශයේදී  අද (5) අත් අඩංගුවට ගනු ලැබූ බව පාරිභෝගික කටයුතු අධිකාරිය සදහන් කරයි. 

පාරිභෝගික කටයුතු පිළිබද අධිකාරියට ලැබුණු තොරතුරක් අනුව  පිටකොටුව ප්‍රදේශයේ සිදුකරන ලද වැටලීමකදී  අනාවරනය කරගත් තොරතුරු මත වත්තල, ඇලකන්ද පාර, උස්වැටකෙයියාව ප්‍රදේශයේ ගබඩාකර  වෙළදපොලට නිකුත්කිරීමට සුදානම් කර තිබු මනුෂ්‍ය පරිභෝජනයට නුසුදුසු තිරිගු පිටි ටොන් 750 කට අධික ප්‍රමාණයක්  මෙලෙස අත් අඩංගුවට ගනු ලැබූ බව එම අධිකාරියේ නිලධාරියෙකු පැවසීය. 

අදාල තිරිගු පිටිවල නිෂ්පාදිත දිනය පසුගිය වසරේ මාර්තු සහ මැයි මාසය ලෙසත්  කල් ඉකුත්වන දිනය මෙම වසරේ මාර්තු සහ මැයි ලෙසත් සදහන්කර  තිබු අතර එම තොගය දැඩි ලෙස කෘමි ආසාදනයට ලක්ව තිබු බැවින් තවදුරටත් ඉදිරියේදී  මෙම තොග වෙළදපොලට නිකුත්වීම වැලැක්වීම සදහා අදාල භාණ්ඩ තොගය නිලධාරීන්  භාරයට ගෙන වැඩිදුර විමර්ශන කටයුතු සිදුකරමින් පවතී.

පසුගිය කාල සීමාව තුල ස්ථාන ගණනාවකින්ම  මෙවැනි මනුෂ්‍ය පරිභෝජනයට නුසුදුසු තිරිගුපිටි තොග සම්බන්ධව වැටලීම් සිදුකරන ලද අතර ඒ සම්බන්ධව නීතිමය පියවයර ගනිමින් පවතී . එමෙන්ම මෙවැනි භාණ්ඩ තදුරටත් නැවත සකස්කර මනුෂ්‍ය පරිභෝජනයට නිකුත්කිරීමට ඉඩ ඇති බැවින් එවැනි ක්‍රියාවන් වැලැක්වීමට පාරිභෝගික කටයුතු පිළිබද අධිකාරිය නිරන්තරව කටයුතු කරන අතර එවැනි වංචනික වෙළදුන් සම්බන්ධව තොරතුරු වෙතොත්  අධිකාරිය දැනුවත් කරන ලෙසත් මහජනතාව දැනුම් දෙනු  ලැබීය. 

එමෙන්ම මෙම ගැටලුව අඛණ්ඩව වෙළදපොල තුල වාර්තා වන බැවින් තිරිගු පිටි මිලදී ගැනීමේදී සැපයුම් කරුවන් සහ අදාල භාණ්ඩ වල තත්වය සම්බන්ධව දැඩි සැලකිල්ලක් දක්වන ලෙසත්  අතරමැදි පුද්ගලයින් විසින් වෙළදපොලට භාණ්ඩ සැපයීමේදී ඔවුන්  සම්බන්ධව විමසිලිමත් වෙමින්  මිලදී ගැනීම්  සිදුකරන ලෙසත් ව්‍යපාරිකයින් දැනුවත් කරන බවත් අධිකාරිය පවසයි. 

තවද,  මෙවැනි කෘමි ආසාදිත තිරිගු පිටි බේකරි  සහ ආහාර නිෂ්පාදනය සදහා භාවිතා කරන්නේද යන්න සම්බන්ධව මෙන්ම සහ වෙළදපලේ අලෙවියට ඉදිරිපත් කරන්නේද  යන්න සම්බන්ධවද  සොයාබලමින් ඔවුන්ට එරෙහිව නීතිය තදින්ම ක්‍රියාත්මක කිරීමට කටයුතු  කරනු ලබන බවත් පාරිභෝගික කටයුතු අධිකාරිය ප්‍රකාශ කරයි

ගම්පහ තිලකරත්න දිසානායක