මහවැලි ගඟෙන් නව වැලි තොටුපොළක්

රටේ ඉදිකිරීම් ක්ෂේත්‍රයට වැලි නොමැති වීම ප්‍රධාන ප්‍රශ්නයක් බවට පත්ව ඇති නිසා පොළොන්නරුව මනම්පිටිය මහවැලි ගඟෙන් වැලිගොඩ දැමීමට නව වැලි තොටුපොලක් ආරම්භ කිරීමට ඉදිරියේදී කටයුතු කරන බව නිවාස ඉදිකිරීම් නියෝජ්‍ය අමාත්‍ය ටී.බි. සරත් මහතා සඳහන් කරයි.

ඒ අනුව වනජීවී දෙපාර්තමේන්තුවට, ශ්‍රී ලංකා මහවැලි අධිකාරියට මෙන්ම භූ විද්‍යා පතල් කැණීම් කාර්යාංශයට අංශයට අදාළ උපදෙස් ලබාදී ඇති බවද, ඊට පොළොන්නරුව දිස්ත්‍රික් සංවර්ධන කමිටුවේ අනුමැතිය ලබාදෙන බවද සරත් මහතා පසුගිය 28 වෙනිදා පැවැති දිස්ත්‍රික් සංවර්ධන කමිටුවේ රැස්වීමේදී සඳහන් කළේය.

පසුගිය වසරට වඩා සියයට දාහතරක් ඉදිකිරීම් ක්ෂේත්‍රයේ වර්ධනයක් තිබෙන බවත්, ඒ අනුව ඉදිකිරීම් කටයුතු සඳහා වැලි ලබාදීම රජයේ ප්‍රමුඛ අරමුණක් හෙයින් පොළොන්නරුව මනම්පිටිය මහවැලි ගගේ තොටුපොලක්  ඉතා කඩිනමින් ආරම්භ කිරීමට පියවර ගන්නා ලෙසද අදාල බලධාරීන්ට සරත් මහතා උපදෙස් දුන්නේය.

පොළොන්නරුව වැලිකන්ද වඩමුනේ ප්‍රදේශයේ බලපත්‍ර නොමැතිව  නීති විරෝධීව වැලි ජාවාරමක් සිදුවන බැවින් එම ප්‍රදේශයට ආරක්ෂක අංශ යොදවා මුරපොලක් යෙදවීමට කටයුතු කරන ලෙසත්, නැගෙනහිර පළාතේ වැලි ජාවාරම ජයටම සිදුවන බැවින් එය නැවැත්වීමට නොහැකි මට්ටමකට පත්ව ඇති බවද සරත් මහතා මෙහිදී හෙළිදරව් කළේය.