මහනුවර ඇසළ පෙරහර මංගල්‍ය අගෝස්තු 05දා ඇරඹෙයි

මෙවර කන්ද උඩරට ඇසළ පෙරහර මංගල්‍යය අගෝස්තු මස 05වැනිදා සිට අගෝස්තු මස 21 වැනි දින දක්වා පැවැත්වීමට නියමිත බව ශ්‍රී දළදා මාලිගාවේ දියවඩන නිලමේ ප්‍රදීප් නිලංග දෑල මහතා නිල වශයෙන් ප්‍රකාශයට පත් කළේය .

ශ්‍රී දළදා මාළිගාවේ බහු කාර්ය ගොඩනැගිල්ලේදී ඊයේ (26දා) පැවති පෙරහර සාකච්ඡාවේදී නිලමේවරයාඒ බව ප්‍රකාශයට පත් කළේය .

අගෝස්තු මස 05 දින අලුයම 4.10 ට යෙදෙන සුබ මුහුර්තියෙන් සිව් මහා දේවාලයන්හි කප් සිටුවා අභ්‍යන්තර පෙරහැර පවත්වා අගෝස්තු මස 10 දින ප්‍රථම කුඹල් පෙරහැර වීදි සංචාරය කිරීමට නියමිත අතර අගෝස්තු මස 15 දින ප්‍රථම රන්දෝලි පෙරහර වීදි සංචාරය කිරීමට නියමිතය .

අගෝස්තු මස 20වැනි දා ඇසළ පුන් පොහෝදින රන්දෝලි මහ පෙරහර වීදි සංචාරය කිරීමට නියමිතය.අගෝස්තු මස 21 දින දවල් පෙරහර වීදි සංචාරය කිරීමෙන් අනතුරුව ඇසළ පෙරහර මංගල්‍යය නිමා වීමට නියමිතය .