මව සමඟ අමනාප වී පෙම්වතාගේ නිවසට ගිය බාල වයස්කාර දැරියකට බරපතළ ලිංගික අපයෝජන කරල

තම මව සමඟ විරසක වී පෙම්වතාගේ නිවසට ගිය 15 හැවිරිදි බාල වයස්කාර දැරියක් හට බරපතල ලිංගික අපයෝජනයක් කල එම පෙම්වතා සහ ඒ සඳහා ආධාර අනුබල දුන් සැකකරුගේ මව අත්අඩංගුවට ගත් බව අනුරාධපුර මූලස්ථාන පොලිසිය පවසයි.

මෙලෙස අත්අඩංගුවට පත්ව ඇත්තේ රාජාංගනය පොලිස් වසමේ  පදිංචි පුතෙකු සහ  මවක්ය. වින්දිත දැරිය අනුරාධපුර පොලිස් වසමේ ගමක තම මව සමගින් සිටියදී, මව සමග ඇති කරගත් බහින්බස්වීමකින් අනතුරුව එම මවට නොදන්වා නිවසින් පිටව ගොස් පෙම්වතාගේ නිවසට ගොස් ඇති බව පොලිසිය කියයි.

එම මව පොලිසියට කල පැමිණිල්ලකට අනුව විමර්ශනයක් සිදු කර රාජාංගනය ප්‍රදේශයට ගොස් දැරිය තම භාරයට ගෙන ප්‍රකාශ සටහන් කර ගැනීමේදී  මෙම අපයෝජනය සිද්ධිය අනාවරණය වූ බව පොලිසිය කියයි.

අත්අඩංගුවට ගත් සැකකරු සහ සැකකාරිය  අනුරාධපුර මහේස්ත්‍රාත් අධිකරණයට ඉදිරිපත් කිරීමට නියමිතව සිටියහ. 

මෙම සිද්ධිය සම්බන්ධයෙන් අනුරාධපුර  මූලස්ථාන පොලිසියේ ස්ථානාධිපති, ප්‍රධාන පොලිස් පරීක්ෂක ආර්. එම්.  ජයවීර මහතාගේ උපදෙස් මත ළමා කාන්තා කාර්යාංශයේ නිලධාරීහු  පිරිසක් වැඩි දුර විමර්ශන සිදු කරති.