මන්ත්‍රී වඩිවේල්ගේ සහාය ජනපතිට

- 12 08 2024 - 18:09 - {{hitsCtrl.values.hits}} views - නවෝද්‍යා පවනි

එළඹෙන ජනාධිපතිවරණයේ දී ලංකා ජාතික වතු කම්කරු සංගමයේ සහය ජනාධිපති රනිල් වික්‍රමසිංහ මහතාට ලබා දෙන බව එම පක්ෂයේ මහ ලේකම් පාර්ලිමේන්තු මන්ත්‍රී වඩිවෙල් සුරේෂ් මහතා අද (12දා) පැවසීය.

වතු කම්කරු ජනතාව ලක්ෂ 17 ක් සමඟ තමන් එම තීරණය ගත් බවද “එක්ව ජයගමු” මාධ්‍ය හමුවට කොළඹදී එක් වෙමින් මන්ත්‍රීවරයා මේ බව සදහන් කළේය.

තමන් ඇතුළු ලංකා ජාතික වතුකම්කරු සංගමයේ දේශපාලන මණ්ඩලය රැස්ව මේ ගැන අවශ්‍ය තීන්දු තීරණ ගත් බවත් නිල වශයෙන් එය ප්‍රකාශ කිරීම තවදුරටත් කල් දැමීමට සිටියත් ජනාධිපතිවරයා අන් කිසිදු රාජ්‍ය නායකයෙක් ලබා නුදුන් සහන රාශියක් වතු කම්කරු ජනතාව වෙත ලබා දුන් නිසා ජනාධිපතිවරයා සහය දීමේ තීරණය ඉක්මනින්ම දැනුම් දීමට කටයුතු කළ බවද මන්ත්‍රීවරයා කියා සිටියේය.

වතු කම්කරු වැටුප්, නිවාස සහ ගුරු සහායක ඇතුළු රැකියා ලබා දෙමින් වතුකරයේ ජනතාවගේ ගැටළු විශාල ප්‍රමාණයක් විසඳීමට ජනාධිපතිවරයාට හැකි වූ බවද වඩිවෙල් සුරේෂ් මන්ත්‍රීවරයා වැඩි දුරටත් කියා සිටියා.