මන්ත්‍රී චාමරගේ චෝදනාවට අමාත්‍යාංශයෙන් පිළිතුරු

පාර්ලිමේන්තු මන්ත්‍රී චාමර සම්පත් දසනායක මහතා විසින් ලංකා විදුලිබල මණ්ඩලයේ සභාපති ආචාර්ය තිලක් සියඹලාපිටිය මහතා සම්බන්ධව කළ අදහස් දැක්වීම බලශක්ති අමාත්‍යවරයා ප්‍රතික්ෂේප කරන බව ලංකා විදුලි බල මණ්ඩලය නිවේදනයක් නිකුත් කරමින් පවසයි.

ලංකා විදුලිබල මණ්ඩලයේ වත්මන් සභාපති ආචාර්ය තිලක් සියඹලාපිටිය මහතා එක්සත් රාජධානියේ කේම්බ්‍රිජ් විශ්ව විද්‍යාලයෙන් විදුලි බල ඉංජිනේරු විද්‍යාව පිළිබඳ ආචාර්ය උපාධියක් ලබා ඇතැයි එම නිවේදනයේ දැක්වෙයි.

මේ සම්බන්ධයෙන් නිකුත් කළ නිවේදනය...

ඔහු 1982 සිට 1984 දක්වා විදුලිබල හා බලශක්ති අමාත්‍යාංශයේ සහ 1988 සිට 1994 දක්වා දක්වා ලංකා විදුලිබල මණ්ඩලයේ සේවය කළේය. තවත් වසර හතරක කාලයක් විදේශයන්හි සේවයෙන් පසු, ඔහු  RMA Energy Consultants (Pvt) Ltd ආයතනයේ ජාත්‍යන්තර බලශක්ති උපදේශකයෙකු ලෙස සේවය කරන ලදී.

2024 සැප්තැම්බර් මාසයේදී, නව රජය ඔහුට ලංකා විදුලිබල මණ්ඩලයේ (CEB) සභාපති ධුරය භාර ගැනීමට ආරාධනා කළ අතර, ඒ වෙනුවෙන් ඔහු එම සමාගමෙන් ඉල්ලා අස්විය. ඔහු සේවය කළ සමාගමට ලංකා විදුලිබල මණ්ඩලයේ හෝ වෙනත් කිසිදු රාජ්‍ය ආයතනයක් සමග ගිවිසුම් නොමැති අතර, ඔහු වෘත්තීය විදුලි පද්ධති සැලසුම්කරුවෙකු වේ.

2001 වසරේදී කුඩා ජල විදුලි මිලකරණ සමාලෝචනයටද, 2008 ජාතික බලශක්ති ප්‍රතිපත්තියටද, 2008 පුනර්ජනනීය බලශක්ති මිලකරණ ප්‍රතිපත්තිය සහ මිල ව්‍යුහයටද, 2009 වහල මත සූර්ය පැනල සංකල්ප සංවර්ධනය ඇතුළු ශ්‍රී ලංකා රජයේ බලශක්ති කේෂ්ත්‍රයේ මුලපිරීම් රාශියකට තම සේවය ලබා දුන් ඔහු, 2019 දී ජාතික බලශක්ති ප්‍රතිපත්ති සමාලෝචන කමිටුවේ සභාපතිත්වයද දැරීය.

ඒ අනුව, ඔහු ලංකා විදුලිබල මණ්ඩලයේ සභාපති ලෙසින් සිටින කාලය තුල ඔහු පුද්ගලිකව හෝ RMA Energy Consultants (Pvt) Ltd ආයතනය හරහා සෘජුව හෝ  වක්‍රව එහි කිසිදු කොන්ත්‍රාත්තුවකට හෝ සැපයුමකට හෝ උපදේශන සේවයක් සැපයීමකට හෝ  සම්බන්ධ නොමැති බව වගකීමෙන් ප්‍රකාශ කර සිටිමු.