බිත්තර තොග මිල රු 19ත් 25ත් අතර මිලක් දක්වා පහළට

ගොවිපළවල්වලින් බිත්තරයක් මිලදී ගන්නා මිල රුපියල් 19ත් 25ත් අතර මුදලක් දක්වා පහත වැටී තිබෙන බවත්, එම වාසිය පාරිභෝගිකයන්ටත් ලැබිය යුතු බවත්  සමස්ත ලංකා කුඩා කර්මාන්තකරුවන්ගේ සංගමය සඳහන් කරයි.

මේ නිසා අතරමැදියන් විසින් බිත්තර මිල ඉහළ දැමීම වළක්වා ගැනීමට යම් වැඩපිළිවෙළක් සකස් විය යුතු බවත්, එසේ නොමැති වුවහොත් පාරිභෝගික ජනතාවට සාධාරණ මිලකට බිත්තරයක් මිලදී ගැනීමට නොහැකි වන බව එම සංගමයේ සභාපති නිරුක්ෂ කුමාර මහතා සඳහන් කළේය.

දෛනික බිත්තර ඉල්ලුම ලක්ෂ අසූවක් බවත්, මේ වන විට එම ප්‍රමාණය ඉක්මවා දෛනිකව වෙළෙඳ පොළට බිත්තර පැමිණෙන බවද පැවසීය.

මේ නිසා ගොවිපළවල්වලින් බිත්තර මිලදී ගන්නා මිල ශීඝ්‍රයෙන් පහත වැටී තිබෙන බවත්, බිත්තර මිල පහළ යාම නිසා ගොවිපළ හිමියන්ද යම් ගැටලුවකට මුහුණ දී සිටින බවද සඳහන් කළේය.

ඉල්ලුමට වැඩියෙන් සැපයුම් තිබෙන සෑම අවස්ථාවකදීම බිත්තර මිල සැලකිය යුතු මුදලකින් අඩුවන බවත්, මේ නිසා එම වාසිය ජනතාවට ලබා දිය යුතු බවද පැවසීය.

ඇතැම් අතරමැදියන් විසින් අධික ලාභයක් ලබා ගැනීමට සිල්ලර වෙළෙඳුන්ට වැඩි මිලට බිත්තර අලෙවි කිරීම සිදුකරන බවත්, පවතින තත්ත්වය තුළ මේ වන විට කුඩා බිත්තරයක් රුපියල් 28ක් වැනි සිල්ලර මිලකට අලෙවි වන බවත්, පොදුවේ බිත්තරයක සිල්ලර මිල රුපියල් 30ක් දක්වා පහත වැටී තිබෙන බවද සඳහන් කළේය.