බැඳුම්කර සහ භාණ්ඩාගාර බිල්පත් වලින් ගත් ණයට වඩා මුදලක් ණය ගෙවා දැමීමට වැය කළා

මෙම වසරේ පළමු මාස 06 තුළ බැඳුම්කර සහ භාණ්ඩාගාර බිල්පත් මගින් ලබා ගත් ණය ප්‍රමාණයට වඩා රුපියල් බිලියන 129ක ණය මුදලක් රජය ගෙවා දැමීමට සමත්ව ඇතැයි මුදල් රාජ්‍ය අමාත්‍ය ශෙහාන් සේමසිංහ මහතා ප්‍රකාශ කළේය.

ඔහු පෙන්වා දුන්නේ අදාළ කාලය තුළ රජය බැඳුම්කර සහ භාණ්ඩාගාර බිලපත් මගින් ලබා ගත් සමස්ත ණය ප්‍රමාණය රුපියල් බිලියන 4852ක් වන අතර, එම කාලය තුළ ගෙවා දමා ඇති ණය ප්‍රමාණයේ වටිනාකම රුපියල් බිලියන 4981ක් වන බවයි.

ඒ අනුව ණය ලබා ගැනීම පිළිබඳ සංඛ්‍යාලේඛන පමණක් සියලු පාර්ශ්ව විසින් විමසා සිටියද ණය ගෙවා දැමීමද රජය නිසි පරිදි සිදු කරමින් පවතින බවද ඔහු පැවසීය.

මේ අතර නව මහ බැංකු පනත සම්මත කරමින් ප්‍රතිසංස්කරණ වැඩසටහන ක්‍රියාත්මක කිරීම හේතුවෙන් රජයද සාමාන්‍ය ව්‍යාපාරයක් පවත්වාගෙන යන ආකාරයට ණය ගැනීම සහ ණය ගෙවීම සිදු කළ යුතු බව රාජ්‍ය අමාත්‍යවරයා වැඩිදුරටත් පෙන්වා දුන්නේය.