නිලාවේලි, අඩම්පෝඩේ ප්රදේශයේදී සයිලන්සරයකට අමතර කොටසක් සවිකර අධික ශබ්දය පිටවන අයුරින් යතුරුපැදියක් ධාවනය කළ පුද්ගලයෙකු අත්අඩංගුවට ගැනීමට යෑමේදී රථවාහන පොලිස් නිලධාරීන් දෙදෙනෙකුට පහරදී රාජකාරියට බාධා කිරීම සම්බන්ධයෙන් යතුරුපැදිය පැදවූ තැනැත්තා අත්අඩංගුවට ගෙන අධිකරණයට ඉදිරිපත් කිරීමෙන් පසු හෙට (03) දින දක්වා රක්ෂිත බන්ධනාගාර ගත කරන ලෙස ත්රිකුණාමලය අතිරේක මහේස්ත්රාත් අර්සරත්නම් අර්ජුන් වෙල්ටන් මහතා නිලාවේලි පොලිසියට නියම කළේය.
මෙසේ බන්ධනාගාරගත වූයේ නිළාවේලී ,අඩම්පෝඩේ ප්රදේශයේ පදිංචි නලීර් මොහොමඩ් සහීර් (18) නැමැති අයෙකෙ.
අත්අඩංගුවට ගත් සැකකරු මුදාගැනීම සඳහා තවත් පිරිසක් එම අවස්ථාවේ රාජකාරීයේ නියුතු රථ වාහන පොලිස් නිලධාරීන් වන පොලිස් කොස්තාපල් (87317) අමිල (103617) ජයවීර යන නිලධාරීන්ට පහරදීම සම්බන්ධයෙන් එක් කාන්තාවක් සහ තවත් පුද්ගලයන් පස්දෙනෙකු අත්අඩංගුවට ගෙන ඇති අතර අත්අඩංගුවට ගැනීමට නියමිත තවත් දෙදෙනෙකු තවත් ප්රදේශයෙන් පලා ගොස් ඇතැයි නිලාවේලි පොලිසිය කියයි .අත්අඩංගුවට ගත් කාන්තාව සහ සැකකරුවන් පස්දෙනා අයුතු ජන රාශිය, පොලිස් නිලධාරීන්ට පහරදීම, රාජකාරියට බාධා කිරීම, පොලිස් නිලධාරියෙකුගේ ජංගම දුරකථනය සහ අත් ඔරලෝසුවකට අනර්ථයක් සිදුකිරීම යන චෝදනා යටතේ කුච්චවේළි සංචාරක මහේස්ත්රාත් අධිකරණයට ඉදිරිපත් කිරීමට නියමිතය .
පහර කෑමට ලක් වූ පොලිස් නිලධාරීන් දෙදෙනා වෛද්ය පරීක්ෂණයක් සඳහා අධිකරණ නියෝග මත ත්රිකුණාමලය මහ රෝහලේ අධිකරණ වෛද්ය නිලධාරී වෙත ඉදිරිපත් කර ඇති අතර සිද්ධිය සම්බන්ධයෙන් නිළාවේලී පොලිස් ස්ථානාධිපති ප්රධාන පොලිස් පරීක්ෂක ඩි.ජී. නිශාන්ත ප්රදිප් කුමාර මහතාගේ ප්රධානත්වයෙන් වැඩිදුර පරීක්ෂණ පැවැත්වේ .
චෙමෝද්යා අමරජීව
