පෙරපාසල් සියයට 50ක ධාරිතාවයකින් ආරම්භ කිරීමට ඉඩ

දිවයිනේ සියළු පෙරපාසල් සෞඛ්‍ය හා විශේෂඥ උපදෙස් අනුව සියයට 50 ක ධාරිතාවයකින් ආරම්භ කිරිමට ඉඩකඩ ලැබෙන බව සෞඛ්‍ය අමාත්‍යවරිය පවසයි. 

ඇහැළියගොඩ ආසනයේ පෙරපාසල් ගූරුවරුන්ගේ ගැටළු පිළිබද සාකච්ඡා කිරිම සදහා  විශේෂ හමුවක් සෞඛ්‍ය හා දේශීය වෛද්‍ය අමාත්‍ය පවිත්‍රා වන්නිආරච්චි මහත්මියගේ සහභාගීත්වයෙන් අද දින (26) ඇහැළියගොඩ ප්‍රදේශයේ දී පැවැති හමුවකදී ඇය මේ බව සඳහන් කළාය.

 “රට විවෘත කර අදට දවස් 45 ක් වෙනවා. රට විවෘත කිරිමත් සමග අප රටේ දෙමව්පියන්ගෙන් ලැබුණු ඉල්ලීම තමයි තමන්ගේ දරුවාට මූලික අධ්‍යාපනය ලබාදෙන පෙරපාසල් විවෘත කිරිම සදහා අවස්ථාව ලබාදෙන ලෙස.

රජය ඒ පිළිබදව අවධානය යෙමු කොට, පෙරපාසල් ගුරුවරු සමග සාකච්ඡා කර තීන්දුවක් ගනු ලැබුවා පෙරපාසල් විවෘත කිරිමට අවස්ථාව සැලසීමට. ඒ අනුව සෞඛ්‍ය අංශ සහ විශේෂඥ උපදෙස් සැළකිල්ලට ගනිමින් දිවයිනේ සියළු පෙරපාසල් සියයට 50 ක පමණ ධාරිතාවයකින් විවෘත කිරිමට මින් පසු ඉඩකඩ ලැබෙනවා. පාසල් ආරම්භ කිරිමටත් බලාපොරොත්තුවක් ඉදිරියේ දී තිබෙන නිසා සෞඛ්‍ය අමාත්‍යංශය මෙම තීන්දුව ගනු ලැබුවා.”