පාතාලයට යතුරු පැදි දුන් දෙදෙනෙක් අල්ලයි

විදේශගතව සැඟව සිට මෙරට  අපරාධ මෙහෙයවන සංවිධානාත්මක අපරාධ කල්ලි නායකයකු  වන ඩුබායි සුද්දා ගේ අපරාධ සඳහා  යතුරුපැදි සොරාගෙන මුදලට සැපයූ පුද්ගලයන් දෙදෙනෙකු හෝමාගම පිටිපන ප්‍රදේශයේදී හොරයින් මත්කුඩු තොගයක් සමග අත්අඩංගුවට ගත් බවහෝමාගම  මූලස්ථාන පොලිසිය කියයි.

සැකකරුවන් දෙදෙනා සන්තකයේ තිබී මත්කුඩු ග්‍රෑම් 20 මිලිගෑම් 600 ක ප්‍රමාණයක් හා යතුරුපැදි  අංක තහඩු දෙකක් පොලිස් භාරයට ගෙන ඇත.

මීට මාස කීපයකට ඉහතදී හෝමාගම, පිටිපන, ඉස්කෝලේ හන්දිය ආසන්නයේ නවතා තිබූ යතුරුපැදියක් අස්ථානගත වී ඇති බවට ලද පැමිණිල්ලකට අනුව ඒ සම්බන්ධයෙන් සී.සී.ටිවි කැමරා දර්ශන ඔස්සේ විමර්ශන කටයුතු සිදුකරමින් සිටි හෝමාගම පොලිස් ස්ථානයේ අපරාධ අංශයේ නිලධාරීන්ට මෙම සැකකරුවන් සම්බන්ධයෙන් ලද හෝඩුවාවක් මත හෝමාගම නගරයේදී  අත්අඩංගුවට ගැනීමට හැකි වූ බව පොලිසිය කියයි.

ඔවුන් දෙදෙනා පොලිස් ස්ථානය රැගෙන විත් සිදුකළ විමර්ශන වලදී පාතාල කල්ලි නායකයින් කිහිප දෙනෙකු සමග ඇති සබඳතා පිළිබඳව අනාවරණය කර ගැනීමට හැකිවූ බවද පොලිසිය පවසයි.

අනතුරුව  සැකකරුවන් දෙදෙනා සම්බන්ධයෙන් හෝමාගම අධිකරණයෙන් ලබාගත් රඳවා ගැනීමේ නියෝග මත සිදුකළ වැඩිදුර විමර්ශනයේදී ඉකුත් ජනවාරි 23 දින මල්වතුහිරිපිටිය  ප්‍රදේශයේ විහාරස්ථානයක හිමිනමකට වෙඩි තබා ඝාතනය කර පලා ගිය සිද්ධියට සම්බන්ධ අත්අඩංගුවට පත්ව දැනට බන්ධනාගාර ගතව සිටින  "චීසා" නැමති පාතාල කල්ලි සාමාජිකයා බැහැදැකීමට මින් එක් සැකකරුවෙකු බන්ධනාගාරයට ගිය අවස්ථාවේදී ඔහු විසින්. ලබාගත් දුරකථන අංකයකට දින කීපයකට පසු ලැබුණු වට්සැප් දුරකථන ඇමතුමක් මගින් හඳුනාගත් ඩුබායි සුද්දා නමැති පාතාල කල්ලි නායකයා සමග එක්ව අපරාධ ක්‍රියාකාරකම් සිදුකිරීමට  යතුරුපැදි සොරකම් කිරීමට සම්බන්ධ වී කටයුතු කළ බව සැකකරුවන් පාපොච්චාරනය කළ බවද පොලිසිය පැවසීය. 

ඩුබායි සුද්දාගෙන් ලැබුණු පළමු වන කොන්ත්‍රාත්තුව අනුව හෝමාගම, පිටිපන, ඉස්කෝලේ හන්දිය ආසන්නයේ නවතා තිබූ එෆ්. ඊසෙඩ් (FZ) වර්ගයේ යතුරුපැදිය සොරකම් කළ බවත් එය සොරකම් කිරීමෙන් පසු  අංක තහඩු ගලවා හබරකඩ ප්‍රදේශයේ පාලු ඉඩමක නවතා දමා එන ලෙසට ඩුබායි සුද්දාගෙන් ලද උපදෙස් මත එය සිදුකළ බවත් ඊට අදාළ මුදල් තම බැංකු ගිණුමට ලැබුණු බවත් සැකකරුවන් ප්‍රකාශ කළ බව පොලිසිය පැවසීය.

එක් යතුරුපැදියක් ලබාදීම වෙනුවෙන් රුපියල් 50000ක  සැකකරුවන් අනාවරණය කර ඇත. මෙවැනි ආකාරයෙන් අපරාධ සඳහා යොදාගැනීමට යතුරුපැදි කිහිපයක් සොරකම් කර ඇති බවත් පිටිපන ප්‍රදේශයේ සොරකම් කරන ලද යතුරුපැදියේ අංක තහඩු දෙක හබරකඩ ප්‍රදේශයේ ඉඩමක් අසල තිබූ කෙසෙල් පඳුරක් අස්සේ සඟවා තිබීයදි  සැකකරුවන්ගේ ප්‍රකාශ මත සොයා ගත් බවත් පොලිසිය සඳහන් කරයි.

මේ අයුරින් ඩුබායි සුද්දාගේ උපදෙස් මත  යතුරුපැදි කීපයක් සොරා ගත් බවත් ඒවා  හබරකඩ පාළු ඉඩමක  නතර කිරීමෙන් අනතුරුව කුමන කාර්යයක් සඳහා කවුරුන් විසින් රැගෙන ගියාදැයි කීමට තමන් නොදන්නා බවක්  වැඩිදුරටත් ප්‍රකාශ කර ඇත.සැකකරුවන් දෙදෙනාගේ දීර්ඝ ලෙස ප්‍රශ්න කිරීමට නියමිතය.

අත්අඩංගුවට පත් සැකකරුවන් දෙදෙනා 24 හා 26 වැනි වයස් කාණ්ඩවල පසු වන හෝමාගම, මායා මාවත ප්‍රදේශයේ සහ හෝමාගම, පිටිපන ප්‍රදේශයේ පදිංචිකරුවන් බවත් පොලිසිය  සිදුකළ විශේෂ විමර්ශනවලදී අනාවරණය කර ගැනීමට හැකි වූ බවද පොලිසිය පවසයි.