ප්‍රසිද්ධ ටෙලි නළුවෙකුගේ පුතා ඩුබායි සිට මෙහෙයවන මත්ද්‍රව්‍ය ජාවාරමට සම්බන්ධ කොස්තාපල් අල්ලයි

ප්‍රසිද්ධ ටෙලි නළුවකුගේ පුතෙකු ඩුබායි රාජ්‍යයේ සැඟව සිට මෙහෙයවන මහා පරිමාණ මත්ද්‍රව්‍ය  ජාවාරමට සම්බන්ධ පොලිස් කොස්තාපල්වරයෙකු අත්අඩංගුවට ගත් බව පොලිස් මත්ද්‍රව්‍ය නාශක  කාර්යාංශය කියයි.

මෙලෙස අත්අඩංගුවට ගෙන ඇත්තේ ගල්කිස්ස පොලිස් කොට්ඨාසයේ  විශේෂ අංශයකට  අනුයුක්තව  සේවය  කරන කොස්තාපල්වරයෙකි.

ඉකුත් මස 26 වෙනි දින කටුනායක ගුවන් තොටුපළේදී  රුපියල් කෝටි 7 කට අධික වටිනා  අයිස් මත්ද්‍රව්‍ය  කිලෝ ගෑම් 5 කට අධික ප්‍රමාණයක් ගමන් මල්ලෙ සහල් ඇසුරුමක් තුළ සඟවා මෙරට රැගෙන ආ පුද්ගලයෙකු හා ඒවා රැගෙන යාම සඳහා ගුවන් තොටුපළ වෙත පැමිණ සිටි ටැක්සි රියදුරෙකුසහ කාන්තාවක අත්අඩංගුවට ගෙන ඒ සම්බන්ධයෙන් සිදු කළ දීර්ඝ විමර්ශනයේදී කොස්තාපල්වරයා සම්බන්ධයෙන්ද කරුණු අනාවරණය වූ බව පොලිසිය සඳහන් කරයි.

විදේශ ගතව සිටින මහා පරිමාණ මත්ද්‍රව්‍ය  ජාවාරම්කරුවන චමිල    නැමැත්තාගේ උපදෙස් මත ජාවාරමෙන් උපයන මුදල් මාළිගාවත්ත ප්‍රදේශයේ පුද්ගලයෙකුට ලබාදෙන බවට විමර්ශනවලදී  අනාවරණය වී යැයි පොලිසිය කියයි.

එයාකාරයෙන් වීරකැටිය ප්‍රදේශයේ පදිංචි සැකකාර කොස්තාපල්වරයා රුපියල් ලක්ෂ 30 ක් මෙන්ම 36 ක මුදලක් අවස්ථා දෙකකදී  ඔහුගේ මවට ලබා දී  යාළුවෙක්  පැමිණියොත් ලබා දෙන ලෙස  පවසා  ලබා දුන් බවට මවගේ  ප්‍රකාශයකින් අනාවරණය වී යැයි පොලිසිය සඳහන් කරයි. 

සැකකාර කොස්තාපල්වරයාගේ පියා ගව පාලනයෙන් ජීවත්වන බවත් එනමුත්  මවගේ  නමින් රුපියල් ලක්ෂ 50 ක ස්ථිර තැන්පතුවක්ද නැගණියගේ නමින් රුපියල් ලක්ෂ 10 ක ස්ථීර තැන්පතුවක්ද තිබෙන බවට මෙතෙක් කරන ලද විමර්ශනවලදී අනාවරණය වී යැයි පොලිසියය සඳහන් කරයි.

31 හැවිරිදි  සැකකාර කොස්තාපල්වරයා ගෙන් රැඳවුම්   නියෝග මත ප්‍රශ්න කිරීමට නියමිතය.පොලිස් මත්ද්‍රව්‍ය  නාශක  කාර්යාංශය පරීක්ෂණ පවත්වයි.