පවිත්‍රාගේ ගැසට්ටුවට ශ්‍රේෂ්ඨාධිකරණයෙන් තහනමක්

විල්පත්තු වෙඩිතළතිව් රක්ෂිතයෙන් ඉස්සන් ගොවිපොළකට අක්කර 415ක් නිදහස් කරමින් වනජීවී අමාත්‍ය පවිත්‍ර වන්නාරච්චි මහත්මිය නිකුත් කළ ගැසට් නිවේදනය ක්‍රියාත්මක කිරීම වහාම වළකාලමින් ශ්‍රේෂ්ඨාධිකරණය අද  (27) අතුරු තහනම් නියෝගය නිකුත් කළේය.

ඉස්සන් ගොවිපොළකට රක්‍ෂිත වනයකින් අක්කර 415ක් නිදහස් කරමින් ගැසට් නිවේදනයක් නිකුත් කිරීම සම්බන්ධයෙන් අධිකරණයේ පෙනී සිට කරුණු පැහැදිලි කිරීමට නියම කරමින් වගඋත්තරකාර අමාත්‍ය පවිත්‍රා වන්නිආරච්චි මහත්මිය ඇතුළු වගුඋත්තරකරුවන්ට නොතීසිද නිකුත් කළේය.

ගොවිපොළකට අක්කර 415ක් නිදහස් කරමින් වනජීවී අමාත්‍ය පවිත්‍ර වන්නාරච්චි මහත්මිය මැයි 06 වැනිදා නිකුත් කළ ගැසට් නිවේදනය හේතූවෙන් විශාල පරිසර හානියක් වන බව පෙන්වා දෙමින් වනජීවී ආරක්ෂණ සංගමය සහ පාරිසරික පදනම ඉදිරිපත් කළ කරුණු සළකා බැලීමෙන් අනතුරුව මෙම පෙත්සම් විභාගය අවසන් වනතුරු වනජීවී අමාත්‍යවරිය නිකුත් කළ ගැසට් නිවේදනය ක්‍රියාත්මක කිරීම වළකාලමින් අදාළ අතුරු තහනම් නියෝගය නිකුත් කළේය.

ශ්‍රේෂ්ඨාධිකරණ විනිසුරුවරුන් වන ප්‍රීතී පද්මන් සුරසේන, ශිරාන් ගුණරත්න සහ අචල වෙන්ගප්පුලි යන මහත්වරුන්ගේ සැදුම්ලත් විනිසුරු මඩුල්ල හමුවේ පෙත්සම සලකා බැලීණි.

වනජීවී  ආරක්ෂණ සංගමය සහ පාරිසරික පදනම ගොනු කර ඇති මූලික අයිතිවාසිකම් පෙත්සමේ වගඋත්තරකරුවන් වශයෙන් වනජීවී අමාත්‍ය පවිත්‍රා වන්නිආරච්චි මහත්මිය ඇතුළු පිරිසක් නම් කර ඇත.

විල්පත්තු වෙඩකලතිව් ජාතික  රක්ෂිතයෙන් හෙක්ටයාර් 168 ප්‍රමාණයක් ඉස්සන් වගාව සඳහා වෙන් කිරීමට යන බව පෙත්සම්කරුවන්ට දැන ගන්නට ලැබුණු බව පවසන පෙත්සම්කරුවෝ ඒ අනුව කළ සොයා බැලීමේදී පසුගිය මැයි 06 වැනිදා වනජීවී අමාත්‍යවරිය වශයෙන් පවිත්‍රා වන්නිආරච්චි මහත්මිය ගැසට් නිවේදනයක් ප්‍රකාශයට පත් කරමින් අදාළ ඉඩම් ප්‍රමාණය වෙන්කර ඇති බව අනාවරණය වු බවද සඳහන් කරති.

මේ තත්ත්වය හේතූවෙන් වන රක්ෂිතයේ විශාල වන විනාශයක් මෙන්ම පරිසර පද්ධතියට විශශාල හානියක් වන බව පෙන්වා දෙන පෙත්සමකාර සංවිධාන මෙම පෙත්සම් විභාග ගැනීමට අවසර දෙන්නැයිද අදාළ ගැසට් නිවේදන ක්‍රියාත්මක කිරීම වළකාලන අතුරු නියෝගය නිකුත් කරන්නැයිද ඉල්ලා සිටිති.

ඉදිරිපත් වු කරුණූ සළකා බැලලීමෙන් අනතුරුව අදාළ නියෝග නිකුත් කළ විනිසුරු මඩුල්ල පෙත්සම්  නොවැම්බර් 12 වැනිදා විභාගයට ගැනීමටද දින නියම කළේය.

පෙත්සම්කාර සංවිධාන වෙනුවෙන් නීතිඥවරුන් වන නිරුෂාන් සිරිමාන්න, දේශානි ගුණතිලක සහ රුක්ෂාන් සේනාධිර සමඟ ජනාධිපති නීතිඥ සංජීව  ජයවර්ධන මහතා පෙනී සිටියේය.වගඋත්තරකරුවන් වෙනුවෙන් ජ්‍යෙෂ්ඨ නීතිඥ රජිව් ගුණරත්න මහතා පෙනී සිටියේය.