පරාටේ නීතිය යළි අප්‍රේල් 01 දා සිට ක්‍රියාත්මකයි

අත්හිටුවා තිබූ පරාටේ නීතිය අප්‍රේල් 01 වැනිදා සිට යළි ක්‍රියාත්මක වන බවත්, කෙසේ වෙතත් දැඩි අපහසුතාවට පත්ව සිටින ක්ෂුද්‍ර, කුඩා හා මධ්‍ය පරිමාණ කර්මාන්ත කරුවන්ට ස්ථිරසාර විසඳුම් ලබා දීමට වත්මන් රජය සහ පසුගිය රජය අපොහොසත් වී තිබෙන බවත් සගි ජන බලවේගයේ නායක, විපක්ෂනායක සජිත් ප්‍රේමදාස මහතා පැවසීය.

ඒ අනුව ඔවුන්ගේ  සුබසිද්ධිය උදෙසා මහපාරට බැස ප්‍රජාතන්ත්‍රවාදී, සාමකාමී වීදි සටනකට සූදානම් බව අද (01දා) හොරණ ප්‍රදේශයේ පැවති ජන හමුවකට එක්වෙම්න් ඔහු සඳහන් කළේය.

“ක්ෂුද්‍ර, කුඩා හා මධ්‍ය පරිමාණ කර්මාන්තකරුවන් පාස්කු ත්‍රස්ත ප්‍රහාරය නිසා , කෝවිඩ් නිසා, රට බංකොලොත් වීම නිසා දැඩි ආර්ථික හානියට ලක් වුණා. රජයේ ජන සංඛ්‍යා ලේඛන දෙපාර්තමේන්තුවම කියනවා පසුගිය කාලයේ ස්ථිර වශයෙන්ම ක්ෂුද්‍ර, කුඩා හා මධ්‍ය පරිමාණ කර්මාන්ත  263,200ක් වැහිලා ගිහින් තිබෙනවා කියලා. ඒවගෙන් තාවකාලිකව වැහිලා තිබෙනවා 59,100ක්, ස්ථිරවම වැහිලා ගිහින් තිබෙනවා 204,100ක්. හිතලා බලන්න මේ රටේ ආර්ථික වර්ධනයට මේ සා විශාල දායකත්වයක් ලබා දෙන කර්මාන්ත කරුවන්ට, ව්‍යවසායකයන්ට, අත්පත්වෙලා තිබෙන ඉරණම. 

පසුගිය කාලය පුරාම පරාටේ නීතිය ක්‍රියාත්මක වන තත්ත්වයක් තුළ මේ කර්මාන්ත කරුවන්ගේ පෞද්ගලික ඉඩම්, දේපළ හිතුමතේට වෙන්දේසි වුණා. පරාටේ නීතිය කියන්නේ ඉතාමත් දරදඬු නීතියක්. පරාටේ නීතිය පාවිච්චි කරලා ක්ෂුද්‍ර, කුඩා හා මධ්‍ය පරිමාණ කර්මාන්ත කරුවන්ගේ ව්‍යාපාර සඳහා ගත් ණය ගෙවන්නට බැරිව කඩිනමින් දේපළ වෙන්දේසි ක්‍රියාත්මක වුණා. තමන්ගේ සම්පත් විකුණා දැම්මා මේ පරාටේ නීතිය නිසා. අපි පාර්ලිමේන්තුව තුළ දැවැන්ත හඬක් නගලා මේ පරාටේ නීතිය ක්‍රියාත්මක කිරීම තාවකාලිකව නැවැත්වූවා.

ඒත් පසුගිය රජයෙන්වත්, වර්තමාන රජයෙන්වත් මේ කර්මාන්ත කරුවන්ට තිරසර විසඳුමක් ලැබිලා නෑ.ගිය ආණ්ඩුව විසිනුත් පරාටේ නීතිය ක්‍රියාත්මක කිරීම මාස කිහිපයකට අත්හිටුවනු ලැබුවා. විශේෂයෙන්ම ජනාධිපිතවරණයක් තිබුණු නිසා. ඒත් අපි තමයි ඒ අත්හිටුවීම කරන්න කියලා ලොකුම හඬ නැගුවේ. දැන් මේ රජයත් තාවකාලිකව පරාටේ නීතිය ක්‍රියාත්මක කිරීම මාස කිහිපයකට අත්හිටුවලා ඒ දවස අවසන් වුණා ඊයේ දවසට. මාර්තු 31 වැනිදාට. දැන් අද දවසේ ඉදලා ආපසු පරාටේ නීතිය ක්‍රියාත්මක කරන්නට බැංකු පද්ධතියට බලය ලැබෙනවා.

අපි ඉල්ලීමක් කළේ පරාටේ නීතිය ක්‍රියාත්මක කිරීම තාවකාලිකව අත්හිටුවලා , ගෙවන්නට බැරිව හිරවෙලා තිබුණු ව්‍යාපාර වලට යම්කිසි විකල්ප විසඳුමක් ලබා දෙන්න , ඒ ණය ප්‍රතිව්‍යුහගත කරනය කරන්න , පොලී සහනයක් ලබා දීලා ඒ ණයෙන් යම් කොටමක් කපා හැරලා මේ කර්මාන්ත කරුවන්ට ස්ථීරසාර විසඳුමක් ලබා දෙන්න කියලා. ඒත් තිබුණු ආණ්ඩුවයි මේ ආණ්ඩුවයි දෙකම කළේ පරාටේ නීතිය තාවකාලිකව අත්හිටුවීම.

ඒ අත්හිටුවීම තුළ තිරසර, ස්ථාවර විසඳුමක් මේ ක්ෂුද්‍ර, කුඩා හා මධ්‍ය පරිමාණ කර්මාන්ත කරුවන්ට ලබා දෙන්නට ඒ අය අපොහොසත් වුණා. ඒ නිසා මේ පිළිබඳව වහාම රජය මැදිහත්වීම අවශ්‍යයි. මේ රටේ ක්ෂුද්‍ර, කුඩා හා මධ්‍ය පරිමාණ කර්මාන්ත කරුවන් වෙනුවෙන් වගකිව යුතු විපක්ෂයක් ලෙස සමගි ජන බලවේගය සංවිධානාත්මකව ඔවුන්ගේ සුබසිද්ධිය උදෙසා මහපාරට බැහැලා ප්‍රජාතන්ත්‍රවාදී, සාමකාමී වීදි සටනකට සූදානම්. ”