නිවසක් කොල්ලකා සි.සි ටි.වි කැමරා පද්ධතියේ ඩි.වි.ආර් යන්ත්‍රය ද රැගෙන ගිහින්

අළුබෝමුල්ල බටදොඹතුඩුව  නිවසකින් රුපියල් ලක්ෂ 17 කට ආසන්න වටිනා මුදල් සහ රන් ආභරණ සොරාගෙන සි සි ටි වි කැමරා පද්ධතියේ ඩි වි ආර් යන්ත්‍රය ද  රැගෙන  ගොස් ඇතැයි අළුබෝමුල්ල පොලිසිය කියයි.

සොරාගෙන ගිය දේපළ අතර පවුම්  11 ක් පමණ බර රන්මාල 2 ක්  අත් පළඳනාවක්,රන් කාසියක් හා ලක්ෂ 4 ක මුදලක් වන බව පොලිසිය සඳහන් කරයි.

නිවෙස් හිමිකාරියගේ සහෝදරියගේ සැමියා සුපවේදියකු වන අතර ඔහු මෙම නිවසේ කිසිවකු නොමැති වීම හේතුවෙන් රාත්‍රී නමයට පැමිණ නිවසට ගොස් විදුලි පහන් දල්වා  අලුයම හයයි තිහට පමණ නැවත එම නිවසට ගොස්  විදුලි පහන් නිවා දැමීමට සූදානම් වීමේදී කාමර වල දොරවල් විවෘත කර ඇති අයුරුත් අල්මාරි ඇද දමා තිබෙන අයුරුත් දුටු බව පොලිසියට කරන ලද පැමිණිල්ලේ  සඳහන් වෙයි.

   අනතුරුව ඒ සම්බන්ධව   සිය බිරිඳගේ සහෝදරියට දන්වා ඇය පැමිණ සිදුකළ පරික්ෂාවේදී නිවසේ සවිකර තිබූ සීසී ටීවී කැමරා පද්ධතියට අයත් ඩි වි ආර් යන්ත්‍රයද පැමිණි සොරුන් විසින් ගලවාගෙන රැගෙන ගොස් ඇති බවට නිරීක්ෂණය වී ඇතැයි පොලිසිය කියයි.

අදාළ සොරකමේ සැකකරුවන් අත්අඩංගුවට ගැනීම සඳහා පානදුර අපරාධ පරීක්ෂණාගාරයෙන් නිලධාරීන් සහ ඇඟිලි සටහන් නිලධාරීන්ට පැමිණ පරීක්ෂණ පැවැත්වූහ