නාමල්ගේ නීතිඥභාවය ගැන හොයන්න නියෝගයක්

පාර්ලිමේන්තු මන්ත්‍රී නාමල් රාජපක්ෂ මහතා නීතිඥභාවය ලබාගැනීම සඳහා නීති විද්‍යාලයේ විභාගයට මුහුණ දීමේදී වංචාවක් කර ඇද්ද? ඔහු නීතිඥභාවය ලබාගෙන ඇත්තේ වංචනික අන්දමින්ද? යන්න පිළිබඳ නීති විද්‍යාලයේ ලේඛන පරීක්ෂා කරබලා අධිකරණයට කරුණු වාර්තා කරන ලෙස කොළඹ ප්‍රධාන මහේස්ත්‍රාත් තනූජා ලක්මාලි මහත්මිය රහස් පොලිසියට අද (03) නියම කළාය.

නීතිඥභාවය ගැනීම සඳහා නාමල් රාජපක්ෂ මහතා ශ්‍රී ලංකා නීති විද්‍යාලයේ විභාගයට මුහුණ දීමේදී වංචා කළ අන්දම ඇසින් දුටු සාක්ෂිකරුවකු බව සමාජ මාධ්‍ය ඔස්සේ කියන තුෂාර ජයරත්න නමැත්තාට ප්‍රකාශයක් දෙන ලෙස විදේශ කටයුතු අමාත්‍යාංශය ඔස්සේ දැනුම දී ඇතැයිද නීතිඥභාවය ගැනීම සඳහා නාමල් රාජපක්ෂ මහතා ශ්‍රී ලංකා නීති විද්‍යාලයේ විභාගයට මුහුණ දීමේදී වංචාවක් කර ඇද්ද යන්න පිළිබඳව විමර්ශන කරන්නේ යැයිද දැනුම් දෙමින් රහස් පොලිසිය කළ ඉල්ලීමක් පිළිගනිමින් මහෙස්ත්‍රාත්වරිය එලෙස නියම කළාය.

අල්ලස හා දූෂණයට එරෙහි පුරවැසි බලය සංවිධානයේ සභාපති ජාමුණි කාමන්ත තුෂාර මහතා පසුගිය පෙබරවාරි 17 වැනිදා රහස් පොලිසියට කළ පැමිණිල්ලකට අනුව සිද්ධිය පිළිබඳ විමර්ශන ආරම්භ කළ බව රහස් පොලිසිය අධිකරණයට දැනුම් දුන්නේය.
සිද්ධියට අදාළව කළ වවිමර්ශන වල ප්‍රගතිය දැක්වෙන වාර්තාවක් ඉදිරිපත් කළ රහස් පොලිසියේ විශේෂ විමර්ශන ඒකකයේ නිලධාරීහු නාමල් රාජපක්ෂ මහතා නිතීඥභාවය ගැනීම සම්බන්ධයෙන් ලැබුණු පැමිණිල්ලකට අනුව විමර්ශනය ආරම්භ කළ බවත් මේ සම්බන්ධයෙන් මීටපෙර කෙසෙල්වත්ත පොලිසියට පවා පැමිණිල්ලක් කර ඇති බවත් එම කරුණු ඔස්සේද විමර්ශන මෙහෙයවන බවත් රහස් පොලිසිය සඳහන් කළේය.

නාමල් රාජපක්ෂ මහතා නිතීඥභාවය ගැනීම සඳහා වංචනික ක්‍රියාවල නිරතවනු ඇසින් දුටු බවට තුෂාර ජයරත්න නමැත්තකු සමාජ මාධ්‍ය ඔස්සේ හෙළිදරව් කරන බවත් ඔහු සම්බන්ධයෙන් කළ සොයා බැලීම් වලදී මේ වන විට ඔහු විදේශ ගතවී ඇති බව අනාවරණය වී ඇති බවත් දැනුම් දුන් නිලධාරීහු සිද්ධිය සම්බන්ධයෙන් ප්‍රකාශයක් දෙන ලෙස විදේශ කටයුතු අමාත්‍යාංශය හරහා ඔහුට දැනුම් දීමක් කර ඇති බවත් දැනුම් දුන්නේය.

නීතිඥ භාවය ගැනීම සඳහා නාමල් රාජපක්ෂ මහතා ශ්‍රී ලංකා නීති විද්‍යාලයේ විභාගයට මුහුණ දීමේදී වංචාවක් කර ඇද්ද? යන්න පිළිබඳ නීති විද්‍යාලයේ ලේඛන පරීක්ෂා කරමින් තවදුරටත් විමර්ශන කරන බවත් දැනුම් දුන් රහස් පොලිසිය නීති විද්‍යාලයේ ලේඛන පරීක්ෂා කර වැඩිදුර විමර්ශනය කිරීමට අවසර දෙන්නැයි අධිකරණයෙන් ඉල්ලා සිටියේය.

කරුණු සලකා බැලීමෙන් අනතුරුව ඒ සඳහා අවසර දුන් මහේස්ත්‍රාත්වරිය විමර්ශන කටයුතු වල ප්‍රගතිය අධිකරණයට වාර්තා කරන ලෙස රහස් පොලිසියට නියම කළාය.

සචිත්‍ර ගුණසේකර