දියණියගේ රූපලාවන්‍යාගාරය විවෘත කිරිමට පැමිණි මව පඩිපෙළින් වැටි මරුට

සිය දියණියගේ රූපලාවන්‍යාගාරය විවෘත කිරීමේ අවස්ථාවට පැමිණ සිටියදී පියගැට පෙළෙන් පය ලෙස ඇද වැටී තුවාල ලැබූ මව ප්‍රතිකාර සඳහා හෝමාගම මූලික රෝහලට ඇතුළත් කිරීමෙන් අනතුරුව මියගොස් ඇතැයි හෝමාගම මූලස්ථාන පොලිසිය පවසයි.

මෙසේ මිය ගොස් ඇත්තේ පිළියන්දල සිද්ධමුල්ල අංක 120 හි පදිංචි වීරසිංහ පතිරණගේ නන්දාවතී නමැති (78) හැවිරිදි කාන්තාවක බව පොලිසිය කියයි.

මෙම කාන්තාව හෝමාගම නගර මධ්‍යයේ තෙමහල් ගොඩනැගිල්ලක දෙවන මහලේ සිය දියණිය විසින් විවෘත කිරීමට නියමිතව තිබූ රූපලාවණ්‍යාගාරයට පැමිණ සිටියදී දෙවන මහලේ සිට පළමු මහලට බැස යාම සදහා ඉදි කර තිබූ පියගැට පෙලෙන් බිමට බැස යාමට සූදානම් වෙද්දී පය ලෙස්සා අඩි හතරක් පමණ පහලට ඇද වැටී අනතුරකට ලක්ව තිබුණි.

අනතුරින් ඇයගේ හිසට බරපතල තුවාල සිදුව බිම වැටී සිටියදී ඒ බව දුටු සැමියා ක්ෂණිකව ක්‍රියාත්මක වී පැමිණ සිටි පිරිසගේ සහායෙන් ප්‍රතිකාර සඳහා හෝමාගම මූලික රෝහලට ඇතුළත් කොට ඇති අතර එහි ප්‍රතිකාර ලබමින් සිටියදී මෙසේ මියගොස් තිබේ.

අනතුරුව මෘත දේහය පිළිබඳ හදිසි මරණ පරීක්ෂණය හෝමාගම මූලික මරණ පරීක්ෂක සාම විනිසුරු චින්තක උදය කුමාර මහතා විසින් (12) දා සිදු කළ අතර මෘත දේහය පිළිබඳ පශ්චාත් මරණ පරීක්ෂණය හෝමාගම මූලික රෝහලේ අධිකරණ වෛද්‍ය නිලධාරී වෛද්‍ය දමිත් අත්තනායක මහතා විසින් සිදු කරන ලදී.

එහිදී ඉදිරිපත් වූ සාක්ෂි සහ පශ්චාත් මරණ පරීක්ෂණ වෛද්‍ය වාර්තාවට අනුව උසක සිට පහළට වැටීමෙන් මොලයට සහ හිස් කබලට සිදු වූ බරපතල හානිය මරණයට හේතුව බවට හදිසි මරණ පරීක්ෂක සාම විනිසුරු චින්තක උදය කුමාර මහතා නිගමනය කළේය.