දළඳා ප්‍රදර්ශනයේ ආරක්ෂාවට ත්‍රිවිධ හමුදාවට අමතරව පොලීසියේ 10000ක්

ඉදිරියේදී පැවැත්වීමට නියමිත  දළදා දැක්ම කාල වකවානුව තුළදී මහනුවර නගරයට ලක්ෂ 22කට අධික බැතිමතුන් පිරිසක් එක් රොක් වෙනු ඇති බවට අනුමාන කරන බවත් එම බැතිමතුන්ගේ ආරක්‍ෂාව සඳහා ත්‍රිවිධ හමුදා නිලධාරීන්ට අමතරව පොලිස් නිලධාරීන් දස දහසක් යෙදවීමට අපේක්ෂා කරන බව මහනුවර කොට්ඨාස භාර ජේෂ්ඨ පොලිස් අධිකාරී අනුරුද්ධ බණ්ඩාරනායක මහතා පවසයි.

ජ්‍යෙෂ්ඨ පොලිස් අධිකාරිවරයා එම අදහස් පළ කර සිටියේ අද (06) මහනුවර මහ ලේකම් කාර්යාල ශ්‍රවණාගාරයේදී මධ්‍යම පළාත් ආණ්ඩුකාර මහාචාර්ය එස්.බී.එස්. අභයකෝන් මහතා හා මහනුවර දිස්ත්‍රික් ලේකම් ඉන්දික උඩවත්ත මහතාගේ ප්‍රධානත්වයෙන් පැවැති සාකච්ඡාවකදීය.

අගෝස්තු මස 18 වැනි දින සිට 27 වැනි දින දක්වා පැවැත්වීමට නියමිත එම දළදා දැක්ම සඳහා විශේෂ ආරක්ෂක වැඩපිළිවෙලක් මහනුවර නගරය කේන්ද්‍ර කර ගනිමින් දියත් කිරීමට නියමිත බවද එහිදී ජ්‍යෙෂ්ඨ පොලිස් අධිකාරිවරයා අවධාරණය කළේය.

දළදා දැක්ම සඳහා බැතිමතුන් මාර්ග තුනක් ඔස්සේ ප්‍රවේශ කර ගැනීමට නියමිත අතර ඩී.එස්. සේනානායක වීදිය, අංපිටිය රතු බෝක්කුව හන්දියෙන් වැව රවුම දෙසින් හා තැන්නේ කුඹුර මාර්ගයේ තල් වත්ත දෙසින් එම පෝලිම් සකස් කිරීමට නියමිත බවද ජ්‍යෙෂ්ඨ පොලිස් අධිකාරිවරයා අවධාරණය කළේය.

පැමිණෙන සෑම බැතිමතෙකුම දෙවරක් ශරීර පරීක්ෂාවට ලක් කෙරෙන බවත් අත්‍යවශ්‍ය දේ පමණක් ඇතුළත් කරගෙන ගමන් මලුරැගෙන එන ලෙසත් ගමන් මලු රැගෙන දළදා මාලිගා පරිශ්‍රයට රැගෙන ඒමට ඉඩ නොදෙන බවත් ඒවා තබා යාමට පහසුකම් සලසන බවද එහිදී අවධාරණය විය.