දකුණේ කප්පම් ජාවාරමට සම්බන්ධ 8ක් අල්ලයි

ඩුබායිහි සැඟවී සිටින පාතාල කල්ලි සාමාජිකයන්ගේ මෙහෙයවීම මත දකුණු පළාතේ ව්‍යාපාරිකයන්ට මරණ තර්ජන එල්ල කොට කප්පම් මුදල් ලබා ගැනීමේ ජාවාරමක නිරත වූ පුද්ගලයන් අට දෙනෙකු සැක පිට ප්‍රශ්න කිරීම සඳහා මාතර කොට්ඨාස ළමා හා කාන්තා කාර්යාංශය මගින් අත්අඩංගුවට ගනු ලැබීය.

එසේ අත්අඩංගුවට ගත් සැකකරුවන් අතර කාන්තාවන් දෙදෙනෙකු සිටින බවද පොලීසිය කියයි.

දකුණු පළාතේ කාලයක පටන් ක්‍රියාත්මකව පැවති මෙම කප්පම් ජාවාරම හේතුවෙන් ඇතැම් ව්‍යාපාරිකයන් බියට පත්ව ඉතා රහසිගත ලෙස කප්පම් මුදල් බැංකුගත කර ඇති බව පොලිස් පරීක්ෂණවලදී හෙළි වී ඇත.

ඒ අනුව ප්‍රධාන සැකකරුවන්ගේ බැංකු ගිණුම්වලට රුපියල් ලක්ෂ දහය පහළොව ආදී වශයෙන් මුදල් ලැබී ඇති බවද අනාවරණය වී තිබේ.

මේ පිළිබඳව මාතර ජ්‍යෙෂ්ඨ පොලිස් අධිකාරී විකුම් ගිනිගේ මහතාට ලද පැමිණිල්ලකට අනුව වැඩිදුර පරීක්ෂණ මාතර කොට්ඨාස ළමා හා කාන්තා කාර්යාංශයේ ස්ථානාධිපතිනී වරුනි කේශලා බෝගහවත්ත මහත්මිය ඇතුළු නිලධාරීන් කණ්ඩායමකට භාර දී ඇත.

ඒ අනුව දීර්ඝ විමර්ශනයකින් පසු සැකකරුවන් කරාපිටිය හා වැලිගම ප්‍රදේශවලදී සැක පිට අත්අඩංගුවට ගෙන තිබේ.

දැනට ඩුබායිහි සැඟවී සිටින පාතාල කල්ලි සාමාජිකයන් වන මිදිගම චූටී,මිදිගම රන්දු හා ශිවා යන සැකකරුවන්ගේ මෙහෙයවීමෙන් මෙම කප්පම් ජාවාරම ක්‍රියාත්මක වී ඇති බවත්, එම නිසා ජාත්‍යන්තර පොලීසිය හරහා ඔවුන් ද අත්අඩංගුවට ගැනීමට පරීක්ෂණ මෙහෙයවන බවත් උසස් පොලිස් නිලධාරියෙක් පැවසීය.

තවද ඔවුන් ව්‍යාපාරිකයන්ට මරණ තර්ජන එල්ල කරන දුරකතන හඩපට කිහිපයක් ද පොලීසිය වෙත ලැබී ඇත.

කප්පම් නොදුන් හේතුව මත 2020 වර්ෂයේ දී වෙඩි ප්‍රහාරයකට ලක්ව ජීවිතය බේරා ගනු ලැබූ ව්‍යාපාරිකයෙකු ගෙන් නැවත නැවත කප්පම් ඉල්ලා තිබෙන බවට ද පොලීසිය කරුණු අනාවරණය කර ගෙන තිබේ.

අත්අඩංගුවට ගත් සැකකරුවන් මාතර මහේස්ත්‍රාත් අධිකරණය හමුවට ඉදිරිපත් කිරීමට නියමිතය.

ක්‍රිෂාන් ජීවක ජයරුක්