ටී 56 වර්ගයේ ගිනි අවියක්, එම උණ්ඩ 113ක් කාන්තාවක් හා පුද්ගලයෙක් අල්ලයි

2025.04.01 වන දින උදෑසන කාලයේ වත්තල පොලිස් වසමේ හේකිත්ත පාර වත්තල ප්‍රදේශයේ පිහිටි ලැගුම්හලක කාමරයක් තුල කාන්තාවක් ගෙල වැළලාගෙන සිටින බවට වත්තල පොලිස් ස්ථානයට ලද පැමිණිල්ලක් මත වත්තල පොලිසිය විසින් විමර්ශන ආරම්භ කර ඇත.

විමර්ශන සිදුකල නිලධාරින් හට ලැගුම්හලේ නාන කාමරයක් තුල කාන්තාවක් සිහිසුන්ව සිටිනු නිරික්ෂණය වී ඇත. නිලධාරින් මෙම කාන්තාව නැවත සිහි ගැන්වීමට කටයුතු කර ඇති අතර අනතුරුව ඇය පරික්ෂා කිරීමේදී අයිස් මත්ද්‍රව්‍ය ග්‍රෑම් 06 මිලිග්‍රෑම් 100ක් ඇය සන්තකයේ තිබීම හේතුවෙන් පොලිසිය විසින් අත්අඩංගුවට ගෙන ඇත.

අත්අඩංගුවට ගත් සැකකාරිය වයස අවුරුදු 35 ක් වන කොළඹ 15 ප්‍රදේශයේ පදිංචිකාරියකි.

සැකකාරියගෙන් සිදුකල වැඩිදුර ප්‍රශ්න කිරීමේදි මෙම කාන්තාව විදේශ ගතව සිටිමින් මත්ද්‍රව්‍ය බෙදාහරින්නෙකු සමග සමීප සම්බන්ධතා පවත්වන බවට හා මත්ද්‍රව්‍ය ජාවාරම්කරු විසින් සුරක්ෂිතව තැබීම සඳහා ඇය වෙත ලබා දෙන ලද ටී 56 ගිනි අවියක් හා එම පතරොම් 113ක් සම්බන්ධයෙන් තොරතුරු අනාවරණය කර ගෙන ඇත. මෙම සැකකාරියගේ මග පෙන්වීම මත ඇය පදිංචිව සිටින දෙවන විවාහයේ සැමියා පදිංචි රාගම ප්‍රදේශයේ නිවසක සඟවා තිබියදී පොලිසිය විසින් එම අවිය හා පතරොම් සොයා ගෙන ඇත.

එම ටී 56 ගිනි අවිය හා පතරොම් සඟවා තිබූ හීන්කෙන්ද, රාගම නිවසේ පදිංචි සැකකාර කාන්තාවගේ වයස අවුරුදු 40ක් වන සැමියාද වත්තල පොලිසිය විසින් අත්අඩංගුවට ගෙන වැඩිදුර විමර්ශන සිදු කරනු ලබයි.