ජාතික ආරක්ෂාව ගැටලුවක් නෑ

මෙරට ජාතික ආරක්ෂාව පිළිබඳ කිසිදු ආකාරයක තර්ජනයක් නොමැති බවත් පාතාල කල්ලි එකිනෙකා අතර ගැටුම් නිර්මාණය වී ඇති බැවින් එය මහජනතාවගේ පොදු ආරක්ෂාවට තර්ජනයක් නොමැති බව ජනාධිපති අනුර කුමාර දිසානායක මහතා පවසයි.

ජනාධිපතිවරයා ඊයේ (23) මහනුවරට පැමිණ ශ්‍රී දළදා සමිඳුන් වැඳ පුදා ගැනීමෙන් අනතුරුව මල්වතු අස්ගිරි මහා නා හිමිවරුන් බැහැ දැක රටේ පවතින වත්මන් දේශපාලන ආර්ථික සමාජමය තත්ත්වයන් පිළිබඳව සාකච්ඡා කිරීමෙන් අනතුරුව මාධ්‍ය හමුවේ අදහස් දක්වමින් ඒ බව අවධාරණය කළේය.

එහිදී ජනාධිපතිවරයා වැඩිදුරටත් අවධාරණය කර සිටියේ මෙම පාතාල කණ්ඩායම් දීර්ඝ කාලයක් තිස්සේ වර්ධනය වුවක් බවත් එය විවිධ ක්ෂේත්‍රවලට ආයතනවලට පැතිර තිබෙන බවයි.

එම පාතාල කල්ලි විනාශකාරී ජාලයක් බවට පත් වී තිබෙන බැවින් එය මුළුමනින්ම මැඩ පැවැත්වීමට දැඩි උත්සාහයක් දරන බවද පැවසීය. එය කිරීමට හැකි වේයැයි ලොකු විශ්වාසයක් තිබෙන බවද අවධාරණය කළ ජනාධිපතිවරයා මෙම ආතාල කල්හි සියල්ල වර්ධනය වී ඇත්තේ දේශපාලන රැකවරණ යටතේ බවද අවධාරණය කළේය.

පාතාල කල්ලි අතර ගැටුම් පිටුපස කවර හෝ හස්තයක් තිබෙන බවට තොරතුරු ලැබී තිබෙන බවත් ඒ පිළිබඳව මේ වන විටත් පරීක්ෂණ ආරම්භ වී ඇති බවදජනාධිපතිවරයා පැවසීය.

පළාත් පාලන මැතිවරණය හැකි ඉක්මනින් පැවැත්වීමට කැමැත්තෙන් සිටින බව අවධාරණය කළ ජනාධිපතිවරයා විපක්ෂ දේශපාලන පක්ෂ මැතිවරණ කොමිසමට ගොස් මැතිවරණය කල් දමා ගැනීමට උත්සාහයක නිරත වී ඇති බවත් මැතිවරණය පැවැත්වීම සඳහා මැතිවරණ කොමිසමට කිසිදු නීතිමය බාධාවක් නොමැති බැවින් රජය විසින් ඒ සඳහා මුදල්ද වෙන්කොට තිබෙන බැවින් මැතිවරණය පැවැත්වීම සඳහා වූ දිනය නියම කිරීමේ බලය ඇත්තේ මැතිවරණ කොමිසමට බැවින් එම දිනය හැකි තරම් ඉක්මනින් ප්‍රකාශයට පත් කරනු ඇති බවද ජනාධිපතිවරයා කීය.

රජයක් මෑත කාලයේ ඉදිරිපත් කරන ලද අයවැය අතරෙන් රාජ්‍ය සේවකයන්ගේ මූලික වැටුප වැඩිම ප්‍රමාණයකින් වැඩි කළ අයවැය මෙවර ඉදිරිපත් කිරීමට හැකි වූ බව පැවසූ ජනාධිපතිවරයා ඒ පිළිබඳව රාජ්‍ය සේවකයන්ට කිසිදු ආකාරයක කනස්සල්ලකට පත්වීමට අවශ්‍යතාවයක් නොමැති බවද පැවසීය.