ජනවාරියේදී වනඅලි 43ක් හා මිනිසුන් 03ක් මරුට

අලි - මිනිස් ගැටුම හේතුවෙන් මෙම වසරේ ජනවාරි මාසය තුළ පමණක් අලි 43ක් සහ මිනිසුන් 03ක් ජීවිතක්ෂයට පත්ව තිබෙන බව පරිසර අමාත්‍ය වෛද්‍ය දම්මික පටබඳි මහතා පැවසීය.

අලි - මින්ස් ගැටුම කෙටි කාලයක් තුළ අවම කර ගැනීමට හැකි වනු ඇති බවට විශ්වාස කරන බවත්, ඒ සඳහා අමාත්‍යාංශය මැදිගත්ව ක්‍රියාමාර්ග ගණනාවක් ගෙන තිබෙන බවත්, වාචික පිළිතුරු අපේක්ෂාවෙන් සමගි ජන බලවේගයේ පාර්ලිමේන්තු මන්ත්‍රී නලීන් බණ්ඩාර මහතා අද (27දා) පාර්ලිමේන්තුවේදී යොමු කළ ප්‍රශ්නයකට පිළිතුරු ලබා දෙමින් හෙතෙම සඳහන් කළේය.

මේ අතර 2024 වසරේ ආරම්භ කළ අලි වැට ඉදිකිරීමේ කටයුතු ක්‍රියාත්මක කිරීම සහ අලි වැට ආරක්ෂා කිරීමටද කටයුතු කර තිබෙන බව අමාත්‍යවරයා පැවසීය.

"2015 සිට මේ දක්වා විදුලි වැට ඉදිකිරීමේ වියදම 2015 - 2019 කාලයේ රු. මිලියන 756.77ක් වෙනවා. 2020-2024 කාලයේදී රු. මිලියන 150.15ක් වෙනවා. ඒ වගේම විදුලි වැය නඩත්තු කිරීම සඳහා 2015 - 2019 කාලයේ රු. මිලියන 178.02ක් වෙන්කරලා තියෙනවා. 2020 - 2024 කාලයේ විදුලි වැට නඩත්තු වියදම රු. මිලියන 51.76ක් වී තිබෙනවා. අලි - මිනිස් ගැටුම හේතුවෙන් මිය ගිය වනඅලි සංඛ්‍යාව 2015 - 2019 කාලයේදී 1,466ක්. 2020 - 2024 කාලයේදී අලි මරණ 2018ක් සිදුව තිබෙනවා. 2025 ජනවාරි 31 දක්වා අලි මරණ 43ක් සිදුව තිබෙනවා. 2015 - 2019 දක්වා මිනිස් මරණ 456ක් සිදුවෙලා තිබෙනවා. 2020 - 2024 කාලයේ මිනිස් මරණ 739ක් සිදුවෙලා තියෙනවා. මේ අවුරුද්දේ ජනවාරි 31 දක්වා මිනිස් මරණ 03ක් සිදුවෙලා තියෙනවා. 

2025 - 2019 කාලයේ දේපළ හානි සංඛ්‍යාව 7744ක් සිදුවෙලා. 2020 - 2024 දක්වා දේපළ හානි 13,724ක් සිදුවෙලා තිබෙනවා. මේ අවුරුද්දේ ජනවාරි මාසය තුළ සිදු වූ දේපළ හානි පිළිබඳ වාර්තා වෙලා නෑ. 2024 වසරේ ආරම්භ කළ විදුලි වැට ඉදිකිරීමේ කටයුතුවලින් මේ වන විට කිලෝමීටර් 5,612ක් ඉදිකරලා තියෙනවා. ඒ වගේම විදුලි වැට ආරක්ෂා කර ගැනීමේ කටයුතු සඳහා මැදිහත් වෙනවා. ඒ සඳහා සිවිල් ආරක්ෂක භටයින් 4,005ක් යොදවලා තියෙනවා.

ඒ වගේම වනඅලි හානි බහුලව සිදුවන ස්ථානවල අලි පලවා හැරීම සඳහා මුරපොළවල් ඇති කරලා සිවිල් ආරක්ෂක භටයන් 737ක් යොදවලා තියෙනවා. මේ ආකාරයට අලි - මිනිස් ගැටුම වැළැක්වීම සඳහා පැතිරුණු ක්‍රියාමාර්ග ගණනාවක් අරගෙන තිබෙනවා. වනඅලි සංචරණ රටාවන් හඳුනා ගැනීම සඳහා ජී.පී.එස්. කරපටි යොදවා විද්‍යාත්මක පරීක්ෂණ සිදුකරලා ඒ දත්ත පාවිච්චි කරගෙන පර්යේෂණ කටයුතු සම්බන්ධයෙන් අපි මැදිහත් වෙනවා. ඒ විදියට පුළුල් ක්‍රියාමාර්ග ප්‍රමාණයක් අරගෙන තිබෙනවා මේ ගැටුම නැති කරන්න,"