ඝාතන චෝදනාවකින් දෙමටගොඩ චමින්ද නිදොස් කොට නිදහස්

පුද්ගලයකුට වෙඩි තබා ඝාතනය කළ බවට චෝදනා ලැබ සිටි මරණීය දණ්ඩනය ලැබ මේ වන විට බන්ධනාගාරයේ සිරදඬුවම් විඳින පාතාල කල්ලි නායක දෙමටගොඩ චමින්ද ඇතුළු විත්තිකරුවන් තිදෙනෙකු සියළු චෝදනා වලින් නිදොස් කොට නිදහස් කළ කොළඹ මහාධිකරණ විනිසුරු නවරත්න මාරසිංහ මහතා එක් විත්තිකරුවකුට පමණක් මරණීය දණ්ඩනය නියම කළේය.

සරත් බණ්ඩාර හෙවත් එස්.එෆ්. සරත් නමැති විත්තිකරුට එරෙහි චෝදනා පැමිණිල්ල විසින් සාධාරණ සැකයකින් තොරව ඔප්පු කර ඇතැයි තීරණය කරමින් ඔහුට මරණීය දණ්ඩනය නියම කළ විනිසුරුවරයා සෙසු විත්තිකරුවන්ට එරෙහි චෝදනා පැමිණිල්ල විසින් සාධාරණ සැකයකින් තොරව ඔප්පු කර නැතැයි තීරණය කරමින් ඔවුන් තිදෙනා සියළු චෝදනා වලින් නිදොස් කොට නිදහස් කළේය.

සාධාරණ සැකයකින් තොරව චෝදනා ඔප්පු කර නැතැයි තීරණය කරමින් සියළු චෝදනා වලින් මෙලෙස නිදොස් කොට නිදහස් කරන ලද්දේ මරණීය දණ්ඩනය ලැබ මේ වන විට බන්ධනාගාරයේ සිරදඬුවම් විඳින පාතාල කල්ලි නායක සිරිනාථ පතිරණගේ චමින්ද රවී ජයනාත් හෙවත් දෙමටගොඩ චමින්ද, මානගේ පුබුදු දුෂ්මන්ත, සමීර සාරංග හෙවත් සුදු නමැත්තන්ය.

2014 අගොස්තු පළමුවැනිදා හෝ ඊට ආසන්න දිනයක දෙමටගොඩ වනාතමුල්ල ප්‍රදේශයේදී එච්. දුමින්ද හෙවත් චානක නමැත්තාට වෙඩි තබා ඝාතනය කළ බවට විත්තිකරුට එරෙහිව නීතීපතිවරයා චෝදනා නඟා තිබිණී.

සිද්ධිය වු දින රාත්‍රීයේ මරණකරු වන එච්. දුමින්ද හෙවත් චානක නමැත්තා සේවය කරමින් සිටි ‘සැලුන්’ එකට කඩා වැඳුණු විත්තිකරුවන් ඔහුට වෙඩි තබා ඝාතනය කළ බවට සාක්කි ඉදිරිපත් විය.

දීර්ඝ නඩු විභාගයකින් අනතුරුව සරත් බණ්ඩාර හෙවත් එස්.එෆ්. සරත් නමැති විත්තිකරුට එරෙහි චෝදනා පැමිණිල්ල විසින් සාධාරණ සැකයකින් තොරව ඔප්පු කර ඇතැයි තීරණය කළ විනිසුරුවරයා සෙසු විත්තිකරුවන්ට එරෙහි චෝදනා පැමිණිල්ල විසින් සාධාරණ සැකයකින් තොරව ඔප්පු කර නැතැයි තීරණය කළේය.

ඒ අනුව සරත් බණ්ඩාර නමැති විත්තිකරුට මරණීය දණ්ඩනය නියම කළ විනිසුරුවරයා සෙසු විත්තිකරුවන් තිදෙනා සිය`ථ චෝදනා වලින් නිදොස් කොට නිදහස් කළේය.

සචිත්‍ර ගුණසේකර