ගුවන්හමුදාවෙන් උතුරේ නිරෝධායනය කල පළමු කණ්ඩායම නිවෙස් වෙතට

කොරෝනා  අවධානම හේතුවෙන් විදෙස් රටවල සිට පැමිණි පුද්ගලයින් ගුවන් හමුදාව යටතේ නිරෝධායනය වන උතුරේ පළමු කණ්ඩායමට අයත් පුද්ගලයින් 206 දෙනෙකු අද (31) දින වන්නි ගුවන් හමුදා කඳවුරේදී නිරෝධායනය  වීමෙන් පසුව සිය නිවෙස් වෙතට රැගෙන යාමට ගුවන් හමුදාව විසින් පියවර ගැනුණි.

ගුවන් හමුදාපති එයාර්මාෂල් සුමන්ගල ඩයස් මහතාගේ උපදෙස් හා අධීක්ෂණය යටතේ වන්නි ගුවන් හමුදා කඳවුරේ අණදෙන නිලධාරී එයාකොමදෝරු ඩී.සී.අයි.වීරසූරිය මහතාගේ නායකත්වයෙන් විදෙස් රටවල සිට පැමිණි පුද්ගලයින් 206 දෙනෙකු රැගෙන ඒමෙන් පසුව පූර්ණ නිරෝධායන ක්‍රියාවලිය වන්නි ගුවන් හමුදාව විසින් ආරම්භ කල අතර දින 14 ක් පුරාවට එම පිරිස් නිරෝධායනයට ලක් කිරීමෙන් පසුව අද (31) දින මෙසේ සිය නිවෙස් වෙතට රැගෙන යන ලදි.

මෙලෙසින් විදෙස් රටවල සිට පැමිණි පුද්ගලයින් උතුරේ ගුවන් හමුදාවට අයත් කඳවුරු තුනක රඳවා තබා ඇති අතර වන්නි, කිලිනොච්චිය ඉරණමඩු හා මුලතිව් යන ගුවන් හමුදා කඳවුරු තුල නිරෝධායන මධ්‍යස්ථාන පිහිටුවා ඇත.

වන්නි ගුවන් හමුදා කඳවුරේදී 206ක් වශයෙන්ද කිලිනොච්චිය ඉරණමඩු ගුවන් හමුදා කඳවුරේ පුද්ගලයින් 172 මුලතිව් ගුවන් හමුදා කඳවුරේ 203 ක් වශයෙන් මුළු  පුද්ගලයින් 581 නිරෝධායනය ක්‍රියාවලියට මුහුණ දී ඇත.

සිය නිරෝධායනය අවසන් වී නිවෙස් වෙතට ගමන් කල පිරිස් කියාසිටියේ රටම කොරෝනා  අවධානමකට මුහුණ දී ඇති අවස්ථාවක විදෙස් රටවලින් පැමිණි කිසිදු අයෙකු බිය නොවී සියලු දෙනාම හැකි ඉක්මනින් නිරෝධායනය වෙනුවෙන් දායකත්වය දී සියලු ජනතාව වෙනුවෙන් ඉදිරිපත් විය යුතු බවටත්ය.

එමෙන්ම විදෙස් රටවලින් පැමිණි පුද්ගලයින් මෙලෙස ගුවන් හමුදාවට හා යුද හමුදාවට භාරදීමට ජනාධිපතිතුමන් විසින් පියවර ගැනීම පිළිබඳව බෙහෙවින්ම සතුටු වන බවටත් තමන්ට කිසිදු අඩුපාඩුවක් නොමැතිව සියලු පහසුකම් සැපයීමට ගුවන් හමුදාව දිවා රාත්‍රී වෙහෙසී සිදු කරන ලද කැප කිරීමට ගුවන් හමුදාපති ඇතුලු සියලු දෙනාට ගෞරවය හා ස්තූතිය පුද කරන බවටත්ය.