පාතාල කල්ලි නායක ගනේමුල්ල සංජීවගේ ඝාතනය සම්බන්ධයෙන් කොළඹ අපරාධ කොට්ඨාසය මගින් සිදු කරන විමර්ශනවලට අදාළව මේ වන විට රැඳවියන් 6 කු ඇතුළු පුද්ගලයන් 47 කුගෙන් ප්රකාශ ලබාගෙන ඇතැයි ජ්යෙෂ්ඨතම පොලිස් නිලධාරියකු පැවසීය.
කොළඹ අළුත් කඩේ අධිකරණ සංකීර්ණයේ අංක පහ ශාලාවේ විත්තිකූඩුව තුළදී නීතිඥ වෙස්ගත් වෙඩික්කරුවකු අතින් වෙඩි ප්රහාරයකට ලක් ව ඝාතනයට ලක් වූ පාතාල කල්ලි නායක ගනේ මුල්ල සංජීව ඉකුත් 19 වෙනිදින ඝාතනයට ලක් විය.
ඒ සම්බන්ධයෙන් වූ විමර්ශන වැඩ බලන පොලිස්පති නීතිඥ ප්රියන්ත වීරසූරිය මහතා විසින් කොළඹ අපරාධ කොට්ඨාසය වෙත පවරනු ලැබීය.
එදින ගනේමුල්ල සංජීව නමැත්තාව බූස්ස බන්ධනාගාරයේ සිට අලුත් කඩේ අධිකරණය වෙත ආරක්ෂාව සපයමින් රැගෙන ආ පොලිස් විශේෂ කාර් බලකා නිලධාරීන්, ගනේමුල්ල සංජීව නමැත්තාව අධිකරණය වෙත රැගෙන ඒමට භාරව සිටි බන්ධනාගාර නිලධාරීන්, ඊට අමතරව අධිකරණ කාර්ය මණ්ඩලය, අධිකරණයේ ඒ මොහොතේ රැඳී සිටි පොලිස් නිලධාරීන්ගෙන්, නීතිඥ මහත්ම මහත්මීන්ගෙන් මෙන්ම එම අවස්ථාවේදී අධිකරණ සිර මැදිරියේ රඳවා සිටි රැඳවියන් අටදෙනාගෙන් හය දෙනකුගෙන් ප්රකාශ මේ වන විට ලබාගෙන ඇතැයි එම නිලධාරියා කීය.
පාතාල කල්ලි නායක ගනේමුල්ල සංජීව නමැත්තාට වෙඩි ප්රහාරය එල්ල වන අවස්ථාවේදී අධිකරණ සිරමැදිරියේ කාන්තා රැඳවියකු ඇතුළු රැඳවියන් අටදෙනකු රඳවා සිට ඇති බවට පොලිස් විමර්ශනවලදී අනාවරණය වී ඇත.
ඒ සම්බන්ධයෙන් විමර්ශන සිදුකරන කොළඹ අපරාධ කොට්ඨාසයේ විශේෂ පොලිස් කණ්ඩායමක් කොළඹ රිමාන්ඩ් බන්ධනාගාරේ රඳවා සිටි රැඳවියන් සිව් දෙනෙකුගෙන් , මැගසින් බන්ධනාගාරයේ රැඳවියෙකුගෙන් සහ වැලිකඩ බන්ධනාගාරයේ කාන්තා රැඳවියෙකුගෙන් ප්රකාශ ලබා ගෙන ඇත..
එම අවස්ථාවේ සිටි තවත් රැඳවියන් දෙදෙනෙකු ඇප මත අධිකරණය මගින් මුදාහැර තිබීම හේතුවෙන් ඔවුන්ගෙන් ප්රකාශ ලබා ගැනීම සඳහා බන්ධනාගාර අධිකාරීවරයාගෙන් එම රැඳවියන් දෙදෙනාගේ පෞද්ගලික තොරතුරු ලබා දෙන ලෙස ඉල්ලා ඇති බව දැනගන්නට ඇතැයි ජ්යෙෂ්ඨ පොලිස් නිලධාරියා කීය.
ගනේ මුල්ල සංජීව නමැත්තා ඝාතනය කිරීමේ සිද්ධියේ අවස්ථාව වන විට අලුත් කඩේ අංක පහ අධිකරණයේ මූලාසනයේ සිටි මහේස්ත්රාත්වරියගෙන්ද ප්රකාශ ලබා ගැනීම සඳහා කොළඹ දිශාව බාර නියෝජ්ය පොලිස්පති හරහා මේ වන විටත් ඉල්ලීමක් කර ඇතැයිද එතුමියගෙන් ඊයේ (4) වන විටත් ප්රකාශ ලබාගෙන නැතැයිද එම ජ්යෙෂ්ඨ නිලධාරියා වැඩිදුරටත් පැවසීය
ඊට අමතරව මහේස්ත්රාත්තුමියගේ පෞද්ගලික ආරක්ෂක නිලධාරීවරයාගෙන්ද ප්රකාශ ලබා ගැනීමට නියමිතය
බස්නාහිර පළාත භාර ජ්යෙෂ්ඨ නියෝජ්ය පොලිස්පති සංජීව ධර්මරත්න මහතාගේ පූර්ණ උපදෙස් මත කොළඹ අපරාධ කොට්ඨාසයේ අධ්යක්ෂක ජ්යෙෂ්ඨ පොලිස් අධිකාරි ඉන්දික ලොකු හෙට්ටි මහතාගේ සෘජු අධීක්ෂණය යටතේ ස්ථානාධිපති ප්රධාන පොලිස් පරීක්ෂක ඩබ්ලිව්. එම්. සි. ඩි. විජේතුංග මහතාගේ මෙහෙයවීමෙන් විමර්ශන සිදු කෙරේ