ගනේමුල්ල සංජීව ඝාතනයේ වෙඩික්කරුගේ තවත් වෙඩි තැබීමක් ගෙන තොරතුරු හෙළිවෙයි

ගණේමුල්ල සංජීවට වෙඩි තබා ඝාතනය කිරීමේ චෝදනා එල්ල වී තිබෙන  සැකකරු, කඳාන වීදී මාවත ප්‍රදේශයේ පිහිටි නිවසකට වෙඩි තැබීමේ සිද්ධියටත් සම්බන්ධ බව පොලීසිය සඳහන් කරයි.

පසුගිය පෙබරවාරි මස 19වනදා අලුත්කඩේ අංක 05 මහේස්ත්‍රාත් අධිකරණයේදී සංවිධානාත්මක අපරාධකරුවෙකු වන සංජීව කුමාර සමරරත්න නොහොත් ගණේමුල්ල සංජීව යන අය වෙඩි තබා ඝාතනය කිරීමේ වෙඩික්කරු වශයෙන් 27 හැවිරිදි සමිඳු දිල්ෂාන් පියුමංග කඳනාරච්චි නම් වූ මෙම සැකකරු අත්අඩංගුවට ගනු ලැබිණි.

ඔහුව මේ වන විට දින 90ක රැඳවුම් නියෝග මත රඳවා තබාගෙන කොළඹ අපරාධ කොට්ඨාසය මගින් විමර්ශන සිදුකරමින් පවතී.
මේ අනුව මෙම සැකකරු 2024.12.13 වන දින කඳාන පොලිස් වසමේ වීදී මාවත ප්‍රදේශයේ පිහිටි නිවසකට ටී 56 වර්ගයේ ගිනිඅවියකින් වෙඩි තබා පලා යාමේ සිද්ධියට සම්බන්ධ වෙඩික්කරු බවට එහිදී අනාවරණය වී ඇති බවද පොලිස් මාධ්‍ය කොට්ඨාසය සඳහන් කරයි.

මෙයද විදෙස්ගතව සිටින සංවිධානාත්මක අපරාධකරුවෙකුගේ මෙහෙයවීම මත සිදුකර ඇති බවටත් පෙන්වා දෙයි. කොළඹ අපරාධ කොට්ඨාසය මේ පිළිබඳ වැඩිදුර විමර්ශන සිදුකරනු ලබයි.