කෝටි 5ක අයිස් සමග අයෙක් කොටුවෙයි

රුපියල් කෝටි 5  කට අධික වටිනා අයිස් මත්ද්‍රව්‍ය තොගයක් සහ කේරළ ගංජා තොගයක්  සමඟ පුද්ගලයෙක් රාජගිරිය ඔබේසේකරපුර ප්‍රදේශයේදී අත්අඩංගුවට ගත් බව වැලිකඩ පොලිසිය පවසයි.

සැකකරු සන්තකයේ තිබී අයිස් මත්ද්‍රව්‍ය කිලෝ 4 ග්‍රෑම් 618 ක් සහ කේරළ ගංජා කිලෝ දෙකයි 2 ගෑම්  170 පොලිස් භාරයට ගෙන ඇත.

වැලිකඩ පොලීසියේ නිලධාරීන්ට ලද තොරතුරකට අනුව  සැකකරු එම මත්ද්‍රව්‍ය තොගය ඔහු පදිංචි නිවසින් පිටතට රැගෙන යාමේදී රැක සිටි පොලිස් නිලධාරීන් කණ්ඩායමක් සැකකරු අත්අඩංගුවට ගත් බව වැලිකඩ පොලීසියේ ස්ථානාධිපති චින්තක අනුරාද මහතා පැවසීය

අත්අඩංගුවට ගත් සැකකරුගෙන් සිදු කළ ප්‍රශ්න කිරීමේදී බොරැල්ල 60 වත්ත අනුශ් නැමැති  මත්ද්‍රව්‍ය ජාවාරම්කරු ට මෙම මත්ද්‍රව්‍ය තොග අයත් බවට ප්‍රකාශ කළ බව පොලිස් නිලධාරියකු සඳහන් කළේය.

රාජගිරිය ඔබේසේකර වත්ත ප්‍රදේශයේ නිවස මත්ද්‍රව්‍ය බෙදාහැරීමේ මධ්‍යස්ථානයක් ලෙස පවත්වාගෙන ගොස් තිබූ බව පොලිස් නිලධාරියා වැඩිදුරටත් පැවසීය. 34  වියේ පසුවන සැකකරු රාජගිරිය පදිංචිකරුවෙකි.

සැකකරු අද අලූත්කඩේ මහේස්ත්‍රාත් අධිකරණය වෙත ඉදිරිපත් කිරීමට නියමිතය.

වැලිකඩ පොලීසියේ ස්ථානාධිපති ප්‍රධාන පොලිස් පරීක්ෂක චින්තක අනුරාද මහතාගේ උපදෙස් මත අපරාධ අංශයේ ස්ථානාධිපති උප පොලිස් පරීක්ෂක සපුගොඩ මහතා ඇතුළු නිලධාරීන් පරීක්ෂණ පවත්වයි.