කොටහේන ඝාතනයේ මෙරට සැලසුම මෙහෙයවූ සැකකරු අල්ලයි

කොටහේන, කොටහේන විදිය ජංගම දුරකථන උපාංග වෙළඳසැලේ හිමිකරුට වෙඩි තබා ඝාතනය කිරීමට මෙරට සැලසුම මෙහෙය වූ  සහ ගිනි අවිය සැපයූ පුද්ගලයා මෝදර මෙත්සඳ සෙවණ ප්‍රදේශයේදී අත්අඩංගුවට ගත් බව කොළඹ උතුර කොට්ඨාස අපරාධ විමර්ශන කාර්යාංශය කියයි.

අත්අඩංගුවට ගත් එම සැකකරු මෝදර පදිංචි 28 හැවිරිදි  පුද්ගලයෙකි.

ඉකුත්  21 වෙනි දින රාත්‍රියේදී යතුරු පැදියකින් පැමිණි පුද්ගලයන් දෙදෙනෙකු ජංගම දුරකථන උපාංග වෙළඳ සැලට කඩා වැදී එහි හිමිකරු වූ කොළඹ 14 ස්ටේට් පාර පදිංචිව සිටි ශෂී කුමාර් නමැති 38 හැවිරිදි  පුද්ගලයා වෙඩි තබා ඝාතනය කර පලායමින් සිටියදී ඔවුන් දෙදෙනා පොලිස් අත්අඩංගුවට පත්විය.

අනතුරුව සඟවා ඇති අවි ආයුධ වගයක් පෙන්වීම සඳහා මට්ටක්කුලිය කාකා දූපත වෙත ගිය අවස්ථාවේදී පොලිස් වෙඩි පහරින් වෙඩික්කරු සහ පැදිකරු යන දෙදෙනාම  මරු මුවටපත්විය.

ජංගම දුරකථන උපාංග වෙළඳසැලේ හිමිකරු ඝාතනය සම්බන්ධයෙන් සිදුකළ විමර්ශනවලදී  වෙඩික්කරුවන්ට ගිනි අවි සැප වූ පුද්ගලයා අත්අඩංගුවට ගෙන සිදු කළ ප්‍රශ්න කිරීමේදී වෙඩික්කරු වූ කැස්බෑව ජබුරලිය පදිංචි අරුණික ලක්මාල් ජයවර්ධන නමැත්තා  කොළඹ කොටුව ප්‍රදේශයේ සිට සැකකරුට අයත් ත්‍රී රෝද රථයෙන් කොස්කස් සන්ධිය ප්‍රදේශයේ පිහිටි. සිය බිරිඳගේ නිවසට කැඳවාගෙන විත් අපරාධය සඳහා ගිනි අවිය සහ  පතුරොම්  ලබා දී ඇති බවටත් අනාවරණය වී යැයි උසස් පොලිස් නිලධාරියා කිය.

අත්අඩංගුවට ගත්  සැකකරු විදෙස් රටක සැඟව සිටින සංවිධානාත්මක අපරාධකරුවෙකු හා මත්ද්‍රව්‍ය ජාවාරම්කරුවකු සමඟ සමීප සම්බන්ධතා පවත්වමින් ඔහු ලබා දෙන උපදෙස්මත මෙරට අපරාධ ක්‍රියාකාරකම් මෙහෙයවනු ලබන පුද්ගලයකු බව පොලිසිය සඳහන් කරයි.

ඉකුත් 10 වෙනි දින කොටහේන පොලිස් වස වසමේ බෙනඩික් මාවතේදී වෙඩි තබා ඝාතනය කිරීමේ සිද්ධිය සඳහා  ගිනි අවිය සැපයූ පුද්ගලයා මෙම සැකකරු බවද පොලිස් විමර්ශනවලදී අනාවරණය වී ඇත.

කොළඹ උතුර  කොට්ඨාස අපරාධ විමර්ශන කාර්යාංශය මගින් අත්අඩංගුවට ගත් සැකකරු වැඩිදුර විමර්ශන සඳහා කොටහේන පොලිසිය වෙත භාරදී ඇත.

කොටහේන පොලිසියේ ස්ථානාධිපති ප්‍රධාන පොලිස් පරීක්ෂක කෝසල ලියන ආරච්චි මහතාගේ උපදෙස් මත අපරාධ විමර්ශන අංශයේ ස්ථානාධිපති උප පොලිස් පරීක්ෂක මාලික අරවින්ද මහතා ඇතුළු කණ්ඩායමක් පරීක්ෂණ පවත්වයි.