කුලී පදනමට ලබාගත් සුඛෝපභෝගී වාහන අඩු මිලට විකුණලා

පෞද්ගලික සමාගමක පරිහරණයට බව පවසා කුලී පදනම මත සුඛෝපභෝගී වාහන ලබාගෙන දිවයිනේ විවිධ ප්‍රදේශවල පුද්ගලයින් රවටා ඉතා අඩු මිලට විකුණා තිබූ සුඛෝපභෝගී වාහන හතළිස් අටක් භාරයට ගෙන වැඩිදුර විමර්ශන සඳහා කොළඹ අපරාධ කොට්ඨාසයට භාරදුන් බව අතුරුගිරිය පොලිසිය පවසයි.

දිවයින පුරා පුද්ගලයින් රවටා කෝටි සියයකට අධික වටීනාකමින් යුත් තවත් වාහන තොගයක් මීට පෙර විකුණා ඇති බවට ද  තොරතුරු අනාවරණය වී ඇතැයි පොලිසිය වැඩිදුරටත් කියයි.

කුලී පදනම මත වාහන ලබා ඒවා වෙනත් පුද්ගලයන්ට විකුණා ඇති බවට හෝමාගම විශේෂ අපරාධ විමර්ශන කොට්ඨාශයට මීට මාසයකට පමණ පෙර පැමිණිලි දෙකක් ලැබී තිබුණි.

ඒ සම්බන්ධයෙන් විමර්ශන සිදුකරමින් සිටියදී ඊට සම්බන්ධ ප්‍රධාන ජාවාරම්කරු අතුරුගිරිය ගල්වරුසාව පාර ප්‍රදේශයේ රැදී සිටින බවට අතුරුගිරිය පොලිසියේ පොලිස් සැරයන් (75072) අරවින්ද නිලධාරියාට තොරතුරක් ලැබී තිබුණි.

ඒ අනුව වාහනයක් මිළදී ගන්නා මුවාවෙන් තැරව් කරුවකු යොදවා වාහනයක් පරීක්ෂා කිරීමට ගොස් සැකකරු අත් අඩංගුවට ගෙන හෝමාගම විශේෂ අපරාධ විමර්ශන කොට්ඨාශයට භාරදී ඔහු මේ වන විට බන්ධනාගාර ගත කර තිබේ.

පසුව මේ සම්බන්ධයෙන් අතුරුගිරිය පොලිසියේ නිලධාරීන් තවදුරටත් විමර්ශන සිදුකරමින් සිටියදී සැකකරු  කොළඹ ප්‍රදේශයේ පෞද්ගලික සමාගමක පාලනාධිකාරිය රවටා සැකකරුට අයත් සමාගමක පරිහරණයට බව පවසමින් වාහන හතළිහක් කුලී පදනමට ලබා ගැනීමේ සිද්ධියක තොරතුරක්ද අනාවරණය වී තිබේ.

මීට අමතරව කොළඹ අවට තවත් පුද්ගලයින් අට දෙනෙකුගෙන් සුඛෝපභෝගී වාහන අටක් ලබාගෙන ඇති බවටද තොරතුරු අනාවරණය වී තිබේ.

ඒ අනුව සිද්ධිය සම්බන්ධයෙන් කඩුවෙල අධිකරණයට කරුණු වාර්තා කොට අධිකරණ නියෝගයක් ලබාගෙන රත්නපුර අවිස්සාවේල්ල නිට්ටඹුව අනුරාධපුරය ඇඹිලිපිටිය ගාල්ල මාතර කළුතර ගම්පහ වේයන්ගොඩ කුරුණෑගල පස්යාල කළුතර හොරණ ඇතුළු ප්‍රදේශ රැසකට විකුණා තිබූ වාහන 48  පොලිස් භාරයට ගත් බව පැවසේ.

එම වාහන රුපියල් ලක්ෂ පනහේ සිට  කෝටි දෙක දක්වා වටිනාකමින් යුත් වාහන වන අතර ඒවා විකුණා ඇත්තේ නියම වටිනාකමින් ලක්ෂ පනහකට අඩුවෙන් බවත් ඒ නිසාම එක් පුද්ගලයකු වාහන දෙක තුන බැගින් ලබා ගත් අවස්ථාද තිබූ බවත්  පොලිසිය කියයි.

සැකකරු සමාගම් අධ්‍යක්ෂකවරයෙකු ලෙස පෙනී සිටිමින් හැඳුනුම්පත් දෙකක් භාවිතා කර ඇති අතර රංජිත් මුණසිංහ (55) හා සංජීව උපුල් විජේරත්න (50) ලෙස නම් දෙකකින් හඳුන්වා දෙමින් පුද්ගලයින් රවටා මෙම ජාවාරම කරගෙන ගොස් ඇති බවට තොරතුරු අනාවරණය වී ඇතැයි පොලීසිය පවසයි.

සිද්ධිය සම්බන්ධයෙන් බස්නාහිර දකුණ භාර නියෝජ්‍ය පොලිස්පති  හසන්ත මාරපන මහතාගේ උපදෙස් මත මෙම වාහන තොගය සම්බන්ධයෙන් වැඩිදුර විමර්ශන සිදු කිරීම සඳහා මේ වනවිට කොළඹ අපරාධ කොට්ඨාශයට භාරදීමට පියවර ගෙන තිබේ.

මත්තෙගොඩ ශාන්ත ප්‍රදීප් කුලරත්න