කජ්ජා ඝාතනයේ ප්‍රධාන සැකකරු අල්ලයි

මිද්දෙණිය  වීර කැටිය මාර්ගයේ ගල් පොත්ත යාය, ඕකන්ද යායට හැරෙන හන්දිය අසලදී   සිදු වූ තිත්ව ඝාතනයේ ප්‍රධාන සැකකරු කටුවන දී  අත්අඩංගුවට ගෙන ඇතැයි පොලිස් මාධ්‍ය කොට්ඨාසය කියයි.

එම තිත්ව ඝාතනය සඳහා යොදාගත් යතුරුපැදිය මිද්දෙණිය දෙබොක්කාව  අඩි පනහක පමණක් ගැඹුරැති වතුරින් පිරි  ගල් කොරියක ගිල්වා තිබියදී සැකකරුගේ ප්‍රකාශ මත සොයාගෙන ඇත.

 මෙම තිත්ව ඝාතනයෙන් එකම පවුලේ පියකු පුතෙකු සහ දියණියක මරුමුවට පත් වූහ.

එලෙස මරුමුවට පත් වූයේ මිද්දෙණිය ගල්පොත්තයාය වෙන්දේසි ඉඩම පදිංචිව සිටි    ඩබ්ලිව්  ඒ ප්‍රියන්ත නොහොත්  කජ්ජා (40) ඔහුගේ දෙවෙනි පුතු ඩබ්ලිව්  ඒ අමිෂ් (9) හාබාල දියණිය වන ඩබ්ලිව්  ඒ ප්‍රමිතා (6) යන අයවලුන්ය.

   ඝාතනයට ලක් වූ ප්‍රියන්ත නමැත්තාගේ    වැඩිමහල් පුතු ඉකුත් 18 වෙනි දින ආපනශාලාවකින් රාත්‍රී ආහාර ඉල්ලූ බැවින් දරුවන් තිදෙනා සමග යතුරු පැමිණ තිබූ කජ්ජා නැමැත්තා වැඩිමහල් පුතු ආපනශාලාවේ නවතා අනෙක් දරුවන් දෙදෙනා සමග යෝගට් ගැනීම සඳහා තවත් වෙළඳසැලක් වෙත යමින් සිටියදී ඕකන්ද යායට හැරෙන හන්දිය අසලදී යතුරු පැදියකින් පැමිණි නාඳුනන පුද්ගලයන් දෙදෙනෙකු ටි 56 ගිනි අවියකින් වෙඩි තබා මෙම අපරාධය සිදු කර තිබිණි.

එම අවස්ථාවේදී ප්‍රියන්ත නොහොත් කජ්ජා නමැත්තා  ස්ථානයේම මියගිය අතර බරපතල තුවාල ලද 6 හැවිරිදි දියණිය රෝහල්ගත කිරීමෙන් අනතුරුව මියගිය අතර දෙවෙනි පුතු දිනකට පසු  රෝහ‍ලේදී මියගියහ

ඝාතනයට ලක් වූ ප්‍රියන්ත නොහොත් කජ්ජා නමැත්තා අපරාධ රැසකට සම්බන්ධ පුද්ගලයකු බවට අනාවරණය වීය.

මෙම අපරාධය සම්බන්ධයෙන් මේ දක්වා සැකකරුවන් අට දෙනකු අත්අඩංගුවට ගෙන ඇති අතර ඒ අතර පොලිස් කොස්තාපල්වරුන් දෙදෙනෙක් සහ යුද හමුදාවෙන් පලා ගොස් පසුව නීත්‍යානුකූලව ඉන් ඉවත් වී සිටි හිටපු හමුදා සෙබළු දෙදෙනෙක්ද වන බව පොලිසිය සඳහන් කරයි.අත්අඩංගුවට ගත් ප්‍රධාන සැකකරු 42 හැවිරිදි පුද්ගලයෙකි.