ඉෂාරා සෙව්වන්දිගේ මව හා සහෝදරයා රඳවාගෙන ප්‍රශ්න කරයි

අපරාධ කල්ලි නායක ගනේමුල්ලේ සංජීවට අධිකරණයේදී වෙඩි තැබීම සඳහා නීතීඥ වෙස්ගත් හිටපු කොමන්ඩෝ සෙබළාට නීතීඥවරියකගේ වෙස් ගෙන ආධාර අනුබල දුන් බව කියන සැකකාරියගේ මව සහ මල්ලී පැය 24ක කාලයක් රඳවාගෙන ප්‍රශ්න කිරීමට කොළඹ ප්‍රධාන මහේස්ත්‍රාත් තනූජා ලක්මාලි මහත්මිය කොළඹ අපරාධ කොට්ඨාශයට අද (25) අවසර දුන්නාය.

සැක්කරුවන් සම්බන්ධයෙන් තවදුරටත් විමර්ශන කරන හෙයින් ඔවුන් රඳවාගෙන ප්‍රශ්න කිරීමට අවසර දෙන්නැයි ඉල්ලමින් කොළඹ අපරාධ කොට්ඨාශය ඉදිරිපත් කළ කරුණු සළකා බැලීමෙන් අනතුරුව මහෙස්ත්‍රාත්වරිය එලෙස අවසර දුන්නාය.

මෙලෙස රඳවාගෙන ප්‍රශ්න කිරීමට අවසර දුන්නේ නීතීඥවරියකගේ වෙස් ගෙන ගනේමුල්ලේ සංජීවට නමැත්තාට අධිකරණය තුළදීම වෙඩි තැබීමට නීතීඥවරයකුගේ වෙස් ගෙන හිටපු කොමන්ඩෝ සෙබළාට ආධාර අනුබල දුන් බව කියන ප්‍රධාන සැකකාරිය වන ඉෂාරා සෙව්වන්දි නමැත්තියගේ මව වන සේසත්පුර දේවගේ සමන්ති සහ ඇගේ බාල සොහොයුරා වන පිංපුර දේවගේ චමිදු තිවංක විරසිංහ නමැත්තන්ය.

සිද්ධියට අදාළව කළ විමර්ශන වල ප්‍රගතිය දැක්වෙන වාර්තා ඉදිරිපත් කළ කොළඹ අපරාධ කොට්ඨාශයේ නිලධාරීහු මෙම අපරාධය කිරීම සඳහා නීතීඥවරියකගේ වෙස් ගෙන වෙඩික්කරුට ආධාර අනුබල දුන් ප්‍රධාන සැකකාරියගේ මව සහ සහෝදරයා ඊයේ (24) අත්අඩංගුවට ගත් බව දැනුම් දුන්හ.

සිද්ධිය සම්බන්ධයෙන් සැකකරුවන්ගෙන් කළ මුලික ප්‍රශ්න කිරීම් වලදී මෙම අපරාධය පිළිබඳව ඔවුන් යම් දැනුවත් භාවයක් තිබු බවට කරුණු අනාවරණය වු බවත් සැකකාරියගේ මව හා සහෝදරයා ඔවුන් දන්නා යම් යම් තොරතුරු වසන් කර ඇති බව අනාවරණය වු බවත් දැනුම් දුන් නිලධාරීහු මනුෂ්‍ය ඝාතනයක් සම්බන්ධයෙන් දැනුවත්ව සිටියදී ඒ පිළිබඳ තොරතුරු වසන් කරමින් අපරාධයට ආධාර අනුබල දීමේ චෝදනාව යටතේ සැකකරුවන් අත්අඩංගුවට ගත් බවත් දැනුම් දුන්හ.

වෙඩික්කරු අධිකරණය තුළදී අපරාධය කළ පසු ඉෂාරා සෙව්වන්දි නමැති ප්‍රධාන සැකකාරිය ඇගේ ‘මැසේන්ජර්’ ගිණුම හරහා බාල සොහොයුරාට කෙටි පණිවිඩ සහ ඇමතුම් යවා ඇති බවත් දැනුම් දුන් කොළඹ අපරාධ කොට්ඨාශයේ නිලධාරීහු සැකකාරිය සොහොයුරාට ‘මැසෙන්ජර්’ හරහා පණිවිඩයක් යවමින් ”උසාවිය ළඟදී සංජීවට ගහනවා” යනුවෙන් දැනුම් දී ඇතැයිද අධිකරණය තුළදී ගණේමුල්ල සංජීව ඝාතනය කළ පසු ‘වැඩේ ඉවරයි’ යනුවෙන් තවත් කෙටි පණිවිඩයක් මැසේජර් හරහා යවා ඇතැයයිද කීහ.

ප්‍රධාන සැකකාරිය මුදල් හුවමාරු කර ඇත්තේ සැකකාර මවගේ බැංකු ගිණුම හරහා බවත් ප්‍රහාරයෙන් පසුව ඇය මීගමුව ප්‍රදේශයේදී රෙදි මිලදී ගෙන තිබෙන්නේද මවගේ බැංකු ගිණුම හරහා බවට සැක පල කරන බවත් කී පොලිසිය සිද්ධිය සම්බන්ධයෙන් මෙම සැකකරුවන් දෙදෙනාගෙන් තවදුරටත් විමර්ශනය කළ යුතු හෙයින් ඔවුන් රඳවාගෙන ප්‍රශ්න කිරීමට අවසර දෙන්නැයි ඉල්ලා සිටියහ.
ඉදිරිපත් වූ කරුණු සලකා බැලීමෙන් අනතුරුව පොලිසියේ ඉල්ලීම පිළිගනිමින් සැකකරුවන් දෙදෙනා පැය 24ක කාලයක් රඳවාගෙන ප්‍රශ්න කිරීමට අවසර දුන් මහේස්ත්‍රාත්වරිය සිද්ධියට අදාළව කරන විමර්ශන කටයුතු වල ප්‍රගතිය වාර්තා කරන ලෙසද නියෝග කළාය.