ආයුර්වේද ඖෂධ සංස්ථාවේ ලක්ෂ 237ක් වංචා කළ එකම පවුලේ තිදෙනෙක් අල්ලයි

මහරගම නාවින්න ශ්‍රී ලංකා ආයුර්වේද ඖෂධ සංස්ථාවේ සේවය කරමින් රුපියල් දෙකෝටි හත් ලක්ෂ තිස්එක්දහස් විසි හතරයි ශත පහළොවක (27,031,024.15) මුදලක් වංචා කිරීම සම්බන්ධයෙන් එහි කළමනාකරණ සහකාර ( ගිණුම් ) වරයෙකු හා ඔහුගේ බිරිඳ සහ සහෝදරිය ද අත්අඩංගුවට ගත් බව අපරාධ පරීක්ෂණ දෙපාර්තමේන්තුව කියයි.

සැකකාරියන් දෙදෙනා අත්අඩංගුවට ගෙන ඇත්තේ මුදල් වංචාවට ආධාර අනුබලදීම සම්බන්ධයෙනි.

මුදල් වංචාව සම්බන්ධයෙන් ලද පැමිණිල්ල අනුව සිදුකළ විමර්ශනවලදී මාස තුනක පමණ කාලයක් තුළදී චෙක් පත් මගින් සැකකරු මෙම වංචාව සිදුකර ඇති බවට විමර්ශනවලදී අනාවරණය වී ඇත.

ඒ අනුව සැකකාර කළමනාකාර සහකාරවරයා අපරාධ පරීක්ෂණ දෙපාර්තමේන්තුව වෙත කැඳවා ප්‍රකාශ ලබා ගැනීමෙන් අනතුරුව අත්අඩංගුවට ගැනීමෙන් අනතුරුව සැකකරුගේ ප්‍රකාශ මත අනාවරණ වූ තොරතුරු අනුව මුදල් වංචාව ට ආධාර අනුබලදීම සම්බන්ධයෙන් සැකකාරියන් දෙදෙනා අඩංගුවට ගෙන ඇත.

අඩංගුවට ගත් සැකකරුවන් සහ සැකකාරියන් කැලණිය ගල් බොරැල්ල බෝධිරුකාරාම පාර එකම නිවසක පදිංචි වයස අවුරුදු 35 ,32 හා 25 වයස් සීමාවල පසුවන්නන්ය.

සැකකරු සහ සැකකාරියන් නුගේගොඩ මහේස්ත්‍රාත් අධිකරණය වෙත ඉදිරිපත් කිරීමට නියමිතය. අපරාධ පරීක්‍ෂණ දෙපාර්තමේන්තුවේ මූල්‍ය විමර්ශන අංක 1 පරීක්ෂණ පවත්වයි.