ආගමන හා විගමන දෙපාර්තමේන්තුව මුද්‍රාව වෙනස් කරයි
ආගමන විගමන දෙපාර්තමේන්තුව ජාත්‍යන්තර ප්‍රමිතීන්ට අනුකූලව , අනුකරණය කළ නොහැකි වන පරිදි ආරක්ෂිත උපක්‍රම භාවිතා කරමින් සහ සංචාරක ආකර්ෂණය ඇති වන පරිදි නව මුද්‍රාවක් මෙම ජූනි මස 01 දින අලුයම 00.00 පැයේ සිට මුළින්ම කටුනායක බණ්ඩාරනායක ජාත්‍යන්තර ගුවන් තොටුපොළ තුළ හදුන්වා දෙමින් ක්‍රියාත්මක කළ බව ආගමන විගමන පාළක ජනරාල් හර්ෂ ඉලුක්පිටිය මහතා පැවසීය.
1948 සිට මෙතෙක් භාවිතා කළ පැරණි මුද්‍රාව බොහෝ වංචනික පුද්ගලයන් අනුකරණය කරමින් ව්‍යාජ මුද්‍රා සකස් කර භාවිතා කර තිබූ අවස්ථාවන් පිළිබඳව තමන් වෙත කරුණු වාර්තා වී තිබූ බව ද ඒ මහතා වැඩිදුරටත් පැවසීය.
මෙම නව මුද්‍රාව ශ්‍රී ලංකාවේ ජාත්‍යන්තර ගුවන් තොටුපොළ , වරාය සහ මගී නෞකා සදහා භාවිතා කිරීම සදහා කාණ්ඩ තුනක් ලෙස වෙනවෙනම මුද්‍රා තුනක් ලෙස නිර්මාණය කර තිබේ.
ආගමන විගමන නිලධාරීන්ගේ සංකල්ප මත නිර්මාණය කර ඇති මෙම නව මුද්‍රාව , වසර ගනනාවක සිට ප්‍රමාද වෙමින් පැවති අතර ආගමන විගමන පාළක ජනරාල් හර්ෂ ඉලුක්පිටිය මහතාගේ මග පෙන්වීම මත මෙම මුද්‍රාව කඩිනමින් එළි දැක්වීමට හැකි වී තිබේ.
කටුනායක බණ්ඩාරනායක ජාත්‍යන්තර ගුවන් තොටුපොළ තුළ ජූනි මස 01 දින මෙම නව මුද්‍රාව භාවිතයට ගැනීමත් සමග ශ්‍රී ලංකාවේ අනෙකුත් ජාත්‍යන්තර ගුවන් තොටුපොළ තුළ ද මෙම නව මුද්‍රාව භාවිතයට ගෙන තිබේ. මෙහි ආගමන මුද්‍රාව නිල් පැහැයෙන් සහ විගමන මුද්‍රාව කොළ පැහැයෙන් භාවිතා කිරීම සිදු වේ.
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
