අයවැය වැඩි ඡන්ද 109කින් සම්මතයි

2025 අය වැය දෙවැනිවර කියවීම වැඩි ඡන්ද 109කින් සම්මත වූ බව කථානායක වෛද්‍ය ජගත් වික්‍රමරත්න මහතා අද (25දා) පාර්ලිමේන්තුවට දැනුම් දුන්නේය.

අය වැයට පක්ෂව ඡන්ද 155ක් සහ විරුද්ධව ඡන්ද 46ක් ලැබුණු අතර, අය වැය ඡන්ද විමසුම සිදුවන අවස්ථාවේ මන්ත්‍රීවරුන් 23ක් සභා ගර්භයේ නොසිටියහ.

මෙහිදී අයවැය විරුද්ධව සමගි ජන බලවේගය,  නව ප්‍රජාතන්ත්‍රවාදී පෙරමුණ, ශ්‍රී ලංකා පොදු ජන පෙරමුණ නියෝජනය කරන මන්ත්‍රීවරුන් අය වැයට විරුද්ධව ඡන්දය භාවිතා කළහ.

ඡන්දය විමසන අවස්ථාවේ ඉලංකෙයි තමිල් අරසු කච්චි පක්ෂයේ මන්ත්‍රීවරුන් මෙන්ම ස්වාධීන පාර්ලිමේන්තු මන්ත්‍රී රාමනාදන් අර්ච්චුනා, සර්ව ජන බලවේගයේ පාර්ලිමේන්තු මන්ත්‍රී දිලිත් ජයවීර, චාමර සම්පත් දසනායක, රෝහිත අබේගුනවර්ධන යන මන්ත්‍රීවරුන් සභා ගර්භයේ නොසිටියහ.

මෙහිදී ජනනායක තමිළ් තේසිය කුට්ටනි පාර්ලිමේන්තු මන්ත්‍රී සෙල්වම් අඩෛක්කලනාදන් මහතා අය වැයට පක්ෂව ඡන්දය භාවිතා කළේය.

2025 අයවැය පළමුවර කියවීම පසුගිය ජනවාරි 09 වැනිදා සිදු කළ අතර, අනතුරුව අය වැය දෙවැනිවර කියවීම හෙවත් අයවැය කථාව ඉදිරිපත් කිරීම මුදල් අමාත්‍යවරයා ලෙස ජනාධිපති අනුර කුමාර දිසානායක මහතා පසුගිය 17 වැනිදා සිදු කළේය.

ඒ අනුව පසුගිය 18 වැනිදා සිට අද (25දා) දක්වා දින 07ක් අයවැය දෙවැනිවර කියවීමේ විවාදය පැවැත්විණි.

මේ අතර 2025 අය වැය තෙවනවර කියවීම හේවත් අය වැය කාරක සභා අවස්ථාවේ විවාදය අනිද්දා (27දා) ආරම්භ වන අතර, එය ලබන මාර්තු 21 වැනිදා දක්වා පැවැත්වීමට කටයුතු යොදා තිබේ.