2025 අයවැය දෙවැනිවර කියවීමේ ඡන්ද විමසීම අද (25දා) පස්වරු 06ට පැවැත්වීමට නියමිතව ඇත. පළමුවර කියවීම සඳහා 2025 අයවැය පසුගිය ජනවාරි 09වැනිදා පාර්ලිමේන්තුවට ඉදිරිපත් කෙරිණ.
අනතුරුව පසුගිය 17 වැනිදා 2025 අයවැය දෙවැනිවර කියවීම හෙවත් අයවැය කතාව මුදල් අමාත්යවරයා ලෙස ජනාධිපති අනුර කුමාර දිසානායක මහතා පාර්ලිමේන්තුවට ඉදිරිපත් කළේය.
පසුගිය 18 වැනිදා සිට අද(25) වැනිදා දක්වා අයවැය දෙවැනි වර කියවීමේ විවාදයට දින 07ක් වෙන් කර තිබුණි.
ඒ අනුව අද දෙවැනිවර කියවීමේ විවාදයේ අවසන් දිනය වන අතර, මෙම විවාදය අවසාන වීමෙන් පසු ඡන්ද විමසීමට නියමිතය.
මේ අතර අයවැය තෙවැනිවර කියවීම හෙවත් කාරක සභා අවස්ථාවේ විවාදය අනිද්දා (27දා) සිට ලබන මාර්තු 21 වැනිදා දක්වා දින 19 පැවැත්වීමට නියමිතව තිබේ.
අනතුරුව ලබන මාර්තු 21 වැනිදා පස්වරු 06ට 2025 අයවැය තෙවැනිවර කියවීමේ ඡන්ද විමසීම පැවැත්වීමට නියමිතව ඇත.