අපුර මූල්‍ය ආයතනයක මහා කොල්ලයක්

අනුරාධපුර නගරයේ,  බැංකු පෙදෙසේ මෛත්‍රීපාල සේනානායක මාවතේ  පිහිටා ඇති පෞද්ගලික මූල්‍ය ආයතනයක සේප්පුව කඩා දමා එහි තිබූ මුදල් හා රන් භාණ්ඩ තොගයක් සොරකම් කර රැගෙන යාමේ සිද්ධියක් සම්බන්ධයෙන් අද  (3 දා) උදෑසන විමර්ශන ආරම්භ කල බව අනුරාධපුර මූලස්ථාන පොලිසිය පවසයි. 

මෙම පෞද්ගලික මූල්‍ය  ආයතනයේ පිටුපස දොර කඩා දමා ඇතුළු වී ඇති  සොරකු හෝ පිරිසක් එහි තිබූ සේප්පුව කපා දමා මෙම සොරකම සිදු කර ඇති බව පොලිසිය කියයි.

මෙම සේප්පුව තුල රුපියල් කෝටියකට වැඩි රන් භාණ්ඩ සහ ලක්ෂ 25 කට ආසන්න මුදලක් තිබූ බවට අප කල විමසීමකදී නිල නොවන ආරංචි මාර්ග සඳහන් කළේය. 

කඩා දමා තිබූ සේප්පුවේ රන් භාණ්ඩ සියල්ල සොරුන් විසින් රැගෙන ගොස් නොතිබූ බවත්  ඉන් කොටසක් සේප්පුව  තුලම දමා ගොස් ඇති අතර, සොරකම් කර රැගෙන ගිය   මුදල් හා රන්  මිල අද  (3දා) දහවල් වන විටත් ගණනය කර නොතිබූ බව අප කල විමසීමකදී උසස් පොලිස් නිලධාරියෙකු පැවසීය.

සිද්ධියට සම්බන්ධ සැකකරුවෙකු හෝ පිරිසක් අත්අඩංගුවට ගැනීම සඳහා පොලිස් කණ්ඩායම් කිහිපයක් යොදවා අංශ කීපයක් ඔස්සේ විමර්ශන ක්‍රියාත්මක බව පොලිසිය වැඩි දුරටත් සඳහන් කළේය. 

උතුරු මැද පළාත භාර නියෝජ්‍ය පොලිස්පති ලක්සිරි විජේසේන , අනුරාධපුර කොට්ඨාස භාර ජේෂ්ඨ පරීක්ෂා අධිකාරී තිලින  හේවාපතිරණ , අනුරාධපුර  කොට්ඨාස අපරාධ  විමර්ශන  අංශය , අපරාධ ස්ථාන   පරීක්ෂණ අංශයේ  ඇතුළු නිලධාරීන් රැසක් එම ස්ථානයට පැමිණ විමර්ශන ආරම්භ කලහ.