අනේ බුදු බව අත්වෙයි මාව මරාගන්න කලින් ලංකාවට ගෙන්වා ගන්න

"මාව දැන් දවස් තුන හතරක් තිස්සේ කාමරයකට දාලා වහලා කන්ඩ බොන්ඩ දෙන්නැතුව ගහනවා, මේ ගෙදර හය දෙනෙක්ගෙ වැඩ මට කරන්න වෙලා, ඒ වැඩ කරන්න අමාරු නිසා තමයි මගේ කම්බුලට ගහලා මාව කාමරයක හිර කරලා දාලා කන්න බොන්නවත්, දෙන්නේ නැත්තේ, මට ඇල්වතුරක් දෙන්නෑ. මට මේ ගෙදර අය පඩි දුන්නෙත් නෑ. මම පොලිසියේ පැමිණිල්ලක් දැම්මා, පොලිසියත් කිව්වේ වැඩිය කියවන්න එපා ගහලා හිරේ දානවා කියලා, මේ ගෙදර පිරිමි ළමයෙක් ඉන්නවා ඒ ළමයා මාත් එක්ක හැමදාම රණ්ඩු වෙනවා, පොලිසියට පැමිණිලි කළත් වැඩක් නෑ.

මේ ගෙදර එක්කෙනෙක් තමයි පොලිසියේ වැඩ කරන්නේ. ඒ පොලිසියේ කෙනා තමයි කිව්වේ ආයෙත් ගෙදරට ගිහිල්ලා වැඩ කරන්න කියලා, ලංකාවට පෙට්ටියකින් යන්න ආසද කියලා කියනවා, අනේ බුදු බව අත්වෙයි මාව මරාගන්න කලින් ලංකාවට ඉගෙන්වා ගන්න" යැයි පොළොන්නරුව දිඹුලාගල අංක 38 මහඋල්පත කාශ්‍යපපුර ගම්මානයේ සිට මීට වසරකට පෙර සෞදියේ ගෘහ සේවයට ගොස් කාමරයක සිර කරගෙන සිටින, දෙදරු මවක වන 33 වියති දිස්නා ශිරෝමි මහත්මිය හැඬූ කඳුළුන් සඳහන් කළාය.

ස්ථීර නිවසක් සහ දරුවන්ට අධ්‍යාපන කටයුතු කරගැනීමට මුදල් උපයා ගැනීමේ අරමුණින් 2022 ඔක්තෝබර් 28 වෙනිදා කුරුණෑගල ප්‍රදේශයේ ඒජන්සියක් හරහා දිස්නා සෞදි රටේ ගෘහ සේවයට පිටත්ව ගියාය.තම දරුවන් දෙදෙනා මවුපියන් ළඟ තබා විදේශගත වූ දිස්නා මේ වනවිට අන්ත අසරණතාවයට පත්ව සිටින්නීය.

"මට මේ ගෙදර අය පඩි දෙන්නේ නැහැ,. ඊට පස්සේ ඒජන්සියේ පැමිණිල්ලක් දාලා තමයි මාසිකව පඩියක් ගත්තේ. දැනට මම සෞදි අරාබියේ සකා නගරයේ ගෙදරක කන්න, බොන්න, නැතුව හිර කරගෙන ඉන්නවා, මේ ගැන මට කියන්න කවුරුවත් නෑ,. පිරිමි හතරකුයි, ගෑනු දෙන්නෙකුගේයි, සේරම වැඩ කරන්න වෙලා තියෙන්නෙ මට.

ඒවා කරන්න අමාරු හින්දා තමයි මට මේ ගෙදර අය දස වධ දෙන්නේ. මගේ කම්මුලටයි ජංගම දුරකථනයටයි එක සැරයක් පොල්ලකින් ගැහුවා. දැන් මගේ කම්මුල පැත්තක් ඉදිමෙලා බේත් හේතුවත් නැහැ. දවස් හතරක් තිස්සේ මේ වගේ මට කන්ඩ බොන්ඩ වතුරවත් නැතුව ඉන්නවා. මාව ඒජන්සේටවත් ගිහින් දාන්න කිව්වට පස්සේ කට්ටිය ගෙදර ගේට්ටුවයි සේරම වහගෙන කාමරේට දාලා මට නිතර නිතර ගහනවා හිරිහැර කරනවා, අනේ මාව ලංකාවට ගෙන්වා ගන්න"

මනම්පිටිය නිමල් ජයරත්න