2025 පුංචි ඡන්දයට නාම යෝජනා බාර ගැනීම මාර්තු 17 සිට 20 දක්වා

ඉදිරියේදී පැවැත්වීමට නියමිත පළාත් පාලන ආයතන 336 ක පළාත් පාලන  ඡන්ද විමසීම- 2025  සඳහා මාර්තු 17 දා සිට මාර්තු 20 දක්වා නාම යෝජනා කැඳවා ඇතැයි මැතිවරණ කොමිෂන් සභාව නිවේදනය කරයි.

ඒ අනුව අම්පාර දිස්ත්‍රික්කයේ කල්මුණේ මහ නගර සභාව හා දෙහිඅත්තකණ්ඩිය ප්‍රාදේශිය සභාව මන්නාරම දිස්ත්‍රික්කයේ මන්නාරම ප්‍රාදේශීය සභාව කිලිනොච්චිය දිස්ත්‍රික්කයේ පුනාකරි ප්‍රාදේශිය සභාව ගාල්ල දිස්ත්‍රික්කයේ ඇල්පිටිය ප්‍රාදේශීය සභාව හැර දිවයිනේ  මහ නගර සභා 28 ක් ,නගර සභා 36 ක් සහ ප්‍රාදේශිය සභා 272 ක් සඳහා නගරාධිපති ,නියෝජ්‍ය නගරාධිපති ,සභාපති ,නියෝජ්‍ය සභාපති  සහ සභිකයන් තෝරා පත්කර ගැනීම සඳහා නාම යෝජනා බාර ගැනීමට අදාළ  නිවේදන මේ වන විට අදාල පළාත් පාලන ආයතනවල ප්‍රසිද්ධ කර ඇතැයි මැතිවරණ කොමිෂන් සභාව පවසයි.

මේ සඳහා ඇප මුදල් තැන්පත් භාරගැනීම අද(3) සිට 19 දා දක්වා( 13 දා  පෝය දිනය සහ ඒ අතර යෙදෙන 8,9,15 සහ 16 යන සෙනසුරාදා, ඉරිදා දින හැර )  දිස්ත්‍රික් ලේකම් /දිසාපති කාර්යාලවලදි සිදු කෙරෙන බවද මැතිවරණ කොමිෂන් සභාව පවසයි.

 නාම යෝජනා බාර ගැනීම  මාර්තු 17 සිට 19 දක්වා පෙරවරු 8.30 සිට  පස්වරු 4.15 දක්වා කාලය තුළ හා මාර්තු 20 දින මධ්‍යාහ්න 12 දක්වා ඒ ඒ තේරීම් බාර නිලධාරීන් විසින් දිස්ත්‍රික් ලේකම්  /දිසාපති කාර්යාලවලදී සිදු කෙරෙන බව මේ සම්බන්ධයෙන්  මැතිවරණ කොමිෂන් සභාව නිකුත් කළ මාධ්‍ය නිවේදනයේ  සඳහන් කරයි.