2025 කොරියා විභාගයට ලියාපදිංචිය තවමත් ආරම්භ කර නෑ

2025 දකුණු කොරියානු භාෂා ප්‍රවීණතා විභාගය සඳහා අයදුම්කරුවන් ලියාපදිංචිය තවමත් ආරම්භ කර නොමැති බැවින්, කොරියානු භාෂා ප්‍රවීණතා විභාගයට ලියාපදිංචි කරන බවට අන්තර්ජාලය ඔස්සේ සංසරණය වන දැන්වීම ව්‍යාජ එකක් බව ශ්‍රී ලංකා විදේශ සේවා නියුක්ති කාර්යාංශය සඳහන් කරයි.

ඒ අනුව සැමවිටම නිවැරදි තොරතුරු ගැනීම සඳහා විදේශ සේවා නියුක්ති කාර්යංශයේ නිල වෙබ් අඩවිය පරිශීලනය කරන ලෙසද කාර්යාංශය ඉල්ලා සිටියි.

මේ අතර මේ පිළිබඳ පැහැදිලි කරමින් විදේශ සේවා නියුක්ති කාර්යාංශයේ අතිරේක සාමාන්‍යාධිකාරී (ජාත්‍යන්තර කටයුතු) සෙනරත් යාපා මහතා මෙසේ පැවසීය.

“EPS වැඩසටහන යටතේ දකුණු කොරියානු රැකියා සඳහා යොමුවීමට අවශ්‍ය මූලික අවශ්‍යතාවයක් ලෙස භාෂා විභාගය හැඳින්විය හැකිය. එය TOPIK විභාගයි. මෙම විභාගය වරින් වර කාර්යාංශය විසින් කොරියානු මානව සම්පත් සංවර්ධන (HRD) ආයතනයේ අනුදැනුම මත ප්‍රසිද්ධියට පත්කරනු ලැබේ.

නමුත් මේ දිනවල විශේෂයෙන්ම සමාජ මාධ්‍ය තුළ සංසරණය වන දැන්වීම ව්‍යාජ දැන්වීමක්. කාර්යාංශය විසින් නිකුත් කළා යැයි හැඟවෙන පරිදි සකස් කළ මෙම දැන්වීමේ අන්තර්ගත වන්නේ EPS TOPIK විභාගය සඳහා අප්‍රේල් මාස 3වෙනිදා සිට 6 දක්වා අයදුම්පත් කැඳවන බවය. මෙම දැන්වීම කාර්යාංශය විසින් නිකුත් කරනු ලැබූ දැන්වීමකට සමානව ව්‍යාජ දැන්වීමක් සමාජ මාධ්‍ය සංසරණය වනු ඇත.

ශ්‍රී ලංකා විදේශ සේවා නියුක්ති කාර්යංශය EPS TOPIK විභාගය සම්බන්ධයෙන් එවැනි කිසිදු අයදුම්පත්‍ර කැඳවීමක් මේ වන විට සිදු නොවෙයි. එමෙන්ම එවැනි දැනුම් දීමක් කොරියානු මානව සම්පත් සංවර්ධන ආයතනය විසින් තවමත් කාර්යාංශය වෙත දැනුම් දීමක් සිදුකර නොමැත.

එබැවින් දකුණු කොරියානු රැකියා විභාගය සඳහා අපේක්ෂාවෙන් සිටින ඔබට ප්‍රකාශ කරන්නේ, මෙය සංසරණය වන දැන්වීම ව්‍යාජ දැන්වීමක් වන අතර, එය ශ්‍රී ලංකා විදේශ සේවා නියුක්තිකි කාර්යාංශයේ දැනුවත් වීමක් තොරව නිකුත් කරන ලද දැන්වීමක් බවයි. මෙහි සඳහන් කර ඇත්තේද කාර්යාංශයේ ගිණුමයි. එමගින් පැහැදිලි වෙන්නේ මෙය ඉතාමත් සංවිධානාත්මකව කිසියම් කණ්ඩායමක්, අයදුම්කරුවන් නොමග යැවීම සඳහා සිදු කරන ලද දැන්වීමක් බවයි. එබැවින් මේ සඳහා හසු නොවන ලෙසත් කිසිවෙකුට මුදල් ගෙවීමෙන් වළකින ලෙසත් ඉල්ලා සිටිනවා” යනුවෙනි.