2024 වසර තුළ වන අලි මරණ 388

2024 වසර තුළ  මෙරට වන අලි  මරණ  388ක් සිදුව ඇති බවත්, එම වන අලි මරණ අතර ඇතුන් 17ක් සිටින බව වනජීවි සංරක්ෂණ දෙපාර්තමේන්තු පවසයි.

වෙඩි තැබීම්වලින්, හක්ක පටස් තැබීමෙන්, විදුලි සැර වැදීමෙන්, දුම්රියේ ගැටීමෙන්, මාර්ග අනතුරුවලින්, වස ශරීර ගත වීමෙන්, දියේ ගිලීමෙන්, වගා ළිංවලට වැටීමෙන්, වැසිකිළි වළවල් තුළට වැටීමෙන්, හදිසි අනතුරුවලින්, ස්වාභාවික අයුරින්, පරපෝෂිත පණු ආසාදනවලින් හා ක්ෂුද්‍ර ජීවීන් රුධිර ගත වීමෙන් ආදී කරුණු හේතුවෙන් මෙම වන අලි හා ඇත් මරණ සිදුවී ඇතැයි වනජීවි සංරක්ෂණ දෙපාර්තමේන්තුවේ අධ්‍යක්ෂ (රක්ෂිත ප්‍රදේශ කළමනාකරණ) මංජුල අමරරත්න මහතා පවසයි.

2024 වසරේදී වන අලි පහරදීමෙන් මිනිසුන් 155කු ජීවිතක්ෂයට පත්ව ඇති බවද තොරතුරු දැන ගැනීමේ පනත යටතේ සිදු කරන ලද විමසීමකට පිළිතුරු සපයමින් අමරරත්න මහතා වැඩිදුරටත්  සඳහන් කොට තිබේ.

2020 වසරේ සිට 2024 වසර දක්වා වූ ගෙවුණු  වසර පහ තුලදී මෙරට වන අලි හා ඇත් මරණ 2018ක් සිදුව ඇති අතර, අලි මිනිස් ගැටුම හේතුවෙන් එම  වසරවලදී වටිනා මිනිස් ජීවිත 742ක් අහිමි වී තිබේ.

2025 වසරේ පෙබරවාරි මස 20 දින වනවිට මෙරට සිදුව ඇති වන අලි හා ඇත් මරණ සංඛ්‍යාව 65ක් බවද, ඉන් මරණ නවයක් සිදු වී ඇත්තේ දුම්රියේ ගැටීමෙන් බව  වනජීවි සංරක්ෂණ දෙපාර්තමේන්තු මූලාශ්‍ර සඳහන් කරයි.

2020 වසරේ සිට 2025 වසරේ පෙබරවාරි මස 20 දින වනවිට දුම්රියේ ගැටීමෙන් පමණක් මෙරට වන අලි මරණ 67ක් සිදුව ඇති බවද එම මූලාශ්‍රවලින් අනාවරණය වේ.

ශාන් හුලංනුගේ