සේවක අර්ථසාධක අරමුදලේ ලියාපදිංචි වීම පැහැර හරිමින් සේවා නියුක්තිකයන්ගේ භාර අරමුදලේ පමණක් ලියාපදිංචිව සිටින සේවා යෝජකයන් සංඛ්‍යාව 2024නොවැම්බර් මස 15වැනිදා වනවිට25,610 ක් දක්වා ඉහළ ගොස් ඇති බව කම්කරු දෙපාර්තමේන්තුවේ විගණන අංශය මගින් අනාවරණය කර ඇත.

විදුලි වැටවල් ඉදිකිරීම සහ එහි නඩත්තු කටයුතු සඳහා ඉකුත් වසර (2021-2023)තුනක කාලයෙහිදී රජය විසින් රුපියල් දෙසිය තිස්පන් කෝටි,පනස්අට ලක්ෂ,අසූ දෙදහස් දෙසිය හතළිස් අටක මුදලක් (2,355,882,248) වැයකොට ඇතත් අලි මිනිස් ගැටුම් අවම වීමක් සිදුවි නොමැති බව ජාතික විගණන කාර්යාලය මගින් නිකුත්කොට ඇති විගණන වාර්තාවක සඳහන් වේ.

මේ වසරේ ජනවාරි 01වන දින සිට පෙරේදා (30දා) දිනය වන විට වනඅලින් 330 ක් මරණයට පත් වී තිබෙන බව වනසත්ත්ව හා ස්වභාව ආරක්ෂක සංගමය සඳහන් කරයි.

දුම්රිය රියදුරන්ට අතිකාල ගෙවිය යුත්තේ සතියට පැය 42 කට වඩා වැඩියෙන් සේවය කරන ලද පැය ගණන පදනම් කර ගෙන වුවත් 2007 වර්ෂයේ සිටම සතියට පැය 42 අඩු කිරීමකින් තොරව අතිකාල ගෙවා තිබෙන බව දුම්රිය දෙපාර්තමේන්තුව සම්බන්ධයෙන් වූ 2023 විගණන වාර්තාවේ සදහන් වේ.

මෙරට උද්ධමනය තවදුරටත් පහළ බැස තිබේ. ඒ අනුව කොළඹ නාගරික ප්‍රජාවගේ පාරිභෝගික උද්ධමන අනුපාතය 2024 නොවැම්බර් මාසය සඳහා -2.1% ක් දක්වා අඩු වී ඇත. එය 2024 ඔක්තෝබර් මාසය සඳහා -0.8% ක් ලෙස වාර්තා වී තිබේ.

අයහපත් කාලගුණයෙන් වගා හානි වූ තමන්ටද වන්දි මුදලක් ලබා දෙන ලෙස වගා හානියට පත් උඩරට එළවළු ගොවීහු රජයෙන් ඉල්ලා සිටිති.

දක්ෂිණ අධිවේගී මාර්ගයේ වැලි පැන්න සහ කුරුඳුගහ හැතැප්ම අතර කිලෝමීටර් 66 දශම 6 ප්‍රදේශයේදී අද (1) සවස පිරිසක් ගමන් ගත් මෝටර් රථයක් හදිසියේ ගිනි ගැනීමට ලක් වූ බව දක්ෂිණ අධිවේගී රථවාහන පොලිසිය කියයි.

මාතලේ ලග්ගල හත්තොට අමුණ ප්‍රදේශයේ මැණික් ව්‍යාපාරිකයකුගේ නිවසක සිදුකරන ලද කෝටි හතක මැණික් හා මුදල් ස්වර්ණාභරණ මංකොල්ලකෑමට අදාළව සැලසුම සිදුකල භික්ෂූන් වහන්සේ නමක් සමග සැකකරුවන් 10 දෙනෙකු හා මුදලින් රුපියල් ලක්ෂ 23 ක් මැණික් ස්වර්ණාභරණ මුදල් සමග අත්අඩංගුවට ගත් බව ලග්ගල පොලිසිය පවසයි.

ශ්‍රී ලංකා වරාය අධිකාරිය මගින් ක්‍රියාත්මක කිරීමට යෝජිත ගාල්ල වරාය සංවර්ධනය කිරීමේ ව්‍යාපෘතිය යටතේ සිදු කිරීමට යෝජිත මුහුද ගොඩ කිරීමේ ව්‍යාපෘතිය සඳහාවූ පරිපූරක පාරිසරික බලපෑම් ඇගැයීමේ වාර්තාව වෙරළ සංරක්ෂණ දෙපාර්තමේන්තුව විසින් මහජන පරීක්ෂාවට ඉදිරිපත් කර ඇත.

ජංගම දුරකථන හා නව තාක්ෂණික ක්‍රම ඔස්සේ සහකරුවන් සොයාගැනීම මෙන්ම නිසි ලිංගික අධ්‍යාපනයක් නොමැතිවීම ඇතුළු කරුණු හේතුවෙන් නව යෞවනයන් අතර HIV වෛරසය ආසාදිතයින් ඉහළ ගොස් ඇති බව ජාතික ලිංගාශ්‍රිත රෝග හා ඒඩ්ස් මර්දන වැඩසටහන පවසයි.

සහල් මිල පාලනය කිරීමට රජය වහා මැදිහත් නොවුනොත් එළඹෙන උත්සව සමයේ කීරි සම්මා කිලෝවක් රුපියල් 300 කට ටද, නාඩු කිලෝවක් රුපියල් 270 කට සහ සම්බා කිලෝවක් රුපියල් 290 ක් දක්වා මිල ඉහළ යෑම වළකාලිය නොහැකි බව එක්සත් සහල් නිෂ්පාදකයින්ගේ සංගමයේ සභාපති මුදිත් පෙරේරා මහතා සඳහන් කළේය.

මේ අතර දීග දන්තු 01 හස්තියාගේ ඉකුත් දා (29) සිදුකළ පශ්චාත් මරණ පරීක්ෂණයේ දී උදරයේ තිබී රුපියල් 10 කාසියක් සොයාගැනීමට මරණ පරීක්ෂණය කළ නිලධාරීන්ට හැකිව තිබේ. මේ අතර දීඝ දන්තු හස්තියා මිය ගිය බව දැනගත් මොහොතේ පටන් එම ස්ථානයට එම සත්ත්වයාගේ දේහය නැරඹීමට පැමිණි පිරිස මිථ්‍යා මත වල එල්බ සිටීම නිසා මියැදුණු දීඝගේ වල්ගයේ කෙඳි සියල්ලම ගලවාගෙන යාමට කටයුතු කර තිබිණි.මෙවැනි අකාරුණික කටයුතු කිරීමෙන් වළකින ලෙසට ද වනජීවි නිළධාරීහූ ජනතාවගෙන් ඉල්ලා සිටිති.

සියලු පාර්ලිමේන්තු මන්ත්‍රීවරුන්ගේ විශ්‍රාම වැටුප් අහෝසි කිරීමේ පනත් කෙටුම්පත කඩිනමින් සම්මත කරන බව අමාත්‍ය වසන්ත සමරසිංහ මහතා පවසයි.

මැලේසියාවට සහ තායිලන්තයට බලපෑ ගංවතුර තත්ත්වය ​හේතුවෙන් පුද්ගලයන් 12 දෙනෙකු ජීවිතක්ෂයට පත්ව තිබේ.

ආනයනික ලොකු ලූනු සඳහා වන වෙළඳ බද්ධ අඩු කිරීමට මුදල් අමාත්‍යාංශය පියවර ගෙන තිබේ.

ජාත්‍යන්තර ක්‍රිකට් කවුන්සිලයේ (අයි.සී.සී) සභාපති ලෙද ජේ ෂා අද(01දා) සිට වැඩ ආරම්භ කර තිබේ.

පසුගියදා පැවති ඇල්පිටිය ප්‍රාදේශීය සභා මැතිවරණයෙන් ජාතික ජනබලවේගයට කොට්ටාශ 15 ක බලය හිමිවූ අතර ඒ අනුව එහි සභාපතිවරයා ලෙස නිශාන්ත පෙරේරා මහතාත් උප සභාපතිවරයා ලෙස සුමිත් පතිරගේ මහතාත් පත්කරමින් මැතිවරණ කොමිසම විසින් අතිවිශේෂ ගැසට් පත්‍රයක් නිකුත් කරනු ලැබීය.

පුද්ගලයකුගෙන් රුපියල් 270.000/= ක අල්ලස් මුදලක් ලබා ගැනීම සම්බන්ධයෙන් මීගමුව කොට්ඨාස අපරාධ විමර්ශන අංශයේ ස්ථානාධිපතිවරයා අත්අඩංගුවට ගත් බව අල්ලස් හෝ දූෂණ චෝදනාව විමර්ශන කොමිෂන් සභාව කියයි.

කාසල්රි, මවුස්සාකැලේ සහ ජල විදුලි බලාගාර ජල පෝෂක ප්‍රදේශවලට පසුගිය දින කිහිපය තුල ඇද හැලුණු අධික වර්ෂාවත් සමග ජල විදුලි උත්පාදනය උපරිම ධාරිතාවෙන් සිදු කරන බව විදුලි බලාගාර ඉංජිනේරුවන් පැවසිය.

නීති විරෝධී ලෙස කොටස් එකලස් කරන ලද ලෑන්ඩ් රෝවර් වර්ගයේ ජීප් රථයක් පොල්ගස්ඕවිට වාහන අලුත් වැඩියා කරන ස්ථානයක තිබී ඊයේ (30) සොයා ගත් බව ගල්කිස්ස කොට්ඨාස අපරාධ විමර්ශන අංශය කියයි.

2009 වසරේදී මෙරටින් පිටවගොස් බ්‍රිතාන්‍ය පුරවැසිභාවය ලබාගත් පුද්ගලයෙක් එම රාජ්‍යයේ සිට ත්‍රස්තවාදි කණ්ඩායමකට මුදල් එකතු කර ලංකාවට පැමිණ කොළඹ ප්‍රදේශයේ හා වන්නි ප්‍රදේශයේ මුදල් බෙදා හැරිම සම්බන්ධයෙන් කොළඹ උතුර අපරාධ කොට්ඨාසය විසින් කොළඹ මහේස්ත්‍රාත් අධිකරණයෙන් ලබාගත් නියොගයක් අනුව එම සැකකරු අත්අඩංගුවට ගෙන තිබේ.

අධික වේගයෙන් සුඛෝභෝගී ජීප් රථයක් ධාවනය කරමින් මහරගම පමුණුව ප්‍රදේශයේදී වාහන හතක් අනතුරට ලක් කර පුද්ගලයකු මරණයට පත් කර තවත් පුද්ගලයකුට බරපතල තුවාල සිදු කිරීම සම්බන්ධයෙන් අත්අඩංගුවට ගත් සැකකාර ජීප් රථ රියදුරු ගංගොඩවිල අධිකරණය වෙත ඉදිරිපත් කිරීමෙන් අනතුරුව මෙම මස 13 වෙනි දින දක්වා රිමාන්ඞ් භාරයේ තබන ලෙස වැඩ බලන මහේස්ත්‍රාත් සුනීතා නානායක්කාර මහත්මිය නියෝග කළේය.

ඉදිරි මැතිවරණ ජයග්‍රහණය කිරීම සදහා එක්සත් ජාතික පක්ෂය හා සමගි ජන බලවේගය එකතු වී අලියා ලකුණින් තරග කළ යුතු යැයි ද මෙය එම පක්ෂ දෙකේ පාක්ෂිකයින් මෙන්ම රටේ බහුතර ජනතාවත් අපේක්ෂා කරන්නක් වන්නේ යැයිද එක්සත් ජාතික පක්ෂයේ නියෝජ්‍ය නායක රුවන් විජයවර්ධන මහතා පැවසීය.

මිල සංශෝධනය කර ඇති අයුරු ඔක්ටේන් 92 පෙට්‍රල් ලීටරයක මිල රුපියල් 02 කින් අඩුකර කර ඇති නව මිල රුපියල් 309කි. ඔක්ටේන් 95 පෙට්‍රල් ලීටරයක මිල වෙනස් නොවන අතර එහි මිල 371කි. ලංකා සුදු ඩීසල් ලීටරයක මිල රුපියල් 03 කින් වැඩි කර ඇති අත නව මිල රුපියල් 286 කි. ලංකා සුපර් ඩීසල් ලීටරයක මිල රුපියල් වෙනස් කර නොමැති අතර එහි මිල 313කි. ලංකා භූමිතෙල් ලීටරයක මිල රුපියල් 05කින් වැඩි කර ඇති අතර එහි නව මිල 188කි.

හම්බන්තොට වරාය මගින් පළමු වරට නෞකාවෙන් නෞකාවකට ද්‍රව භාණ්ඩ හුවමාරුව ආරම්භ කර ඇත. ඒ අනුව, සිංගප්පූරු සමාගමක් වන ෂිප්ලෝඩ් මැරිටයිම් සමග එක්ව ලාෆ් ගෑස් සමාගමේ නෞකාවකට ද්‍රව පෙට්‍රෝලියම් වායූ හුවමාරුව සිදු කර ඇති බව වරාය අධිකාරිය නිකුත් කළ නිවේදනයක් මගින් සඳහන් කර ඇත.

මොරටුව විශ්ව විද්‍යාලයේ වෛද්‍ය පීඨයේ ඉගෙනුම ලබන වෛද්‍ය සිසුන් සඳහා මහාචාර්ය පුහුණුව ලබා දීමට නිසි පහසුකම් හා අවශ්‍ය සම්පත් සහිත රෝහලක් නොතිබීමෙන් මතුව පැවති ගැටලුවට කඩිනම් විසදුම් ලබාදීමත්, මාලඹේ වෛද්‍ය නෙවිල් ප්‍රනාන්දු රෝහල කාර්යක්ෂම රෝහලක් ලෙස සංවර්ධනය කිරීම පිළිබදවත් සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතාගේ අවධානය යොමුවී ඇත

කාර්තිව් - මාවඩිප්පලි මාර්ගයේ ට්‍රැක්ටරයක් ජල ප්‍රහාරයකට හසු වීමෙන් සිදු වූ අනතුරේදී අතුරුදන්ව සිටි අවසන් පාසල් සිසුවාගේ මළ සිරුර අද (30) සොයාගත් බව පොලිස් මාධ්‍ය කොට්ඨාසය කියයි.

2023/2024 තක්සේරු වර්ෂය සඳහා ආදායම් බදු වාර්තා ඉදිරිපත් කිරීමේ අවසන් දිනය අද (30) බව දේශීය ආදායම් දෙපාර්තමේන්තුව කියයි.

එහි දී වැඩිදුරටත් අදහස් දක්වමින් ඇය පැවසුවේ, නව රජයේ වැඩපිළිවෙළ අනුව මත්ද්‍රව්‍ය මර්දනය ඉතා ප්‍රමුඛ සහ හදිසි වගකීමක් ලෙස සලකන බවයි. දේශීය ආර්ථික හා සමාජ අර්බුද ඇති කරමින් රටේ අනාගතය අඳුරු කිරීම කෙරෙහි දරුණු බලපෑම් ඇති කරනු ලබන ජාතික හා ජාත්‍යන්තර මත්ද්‍රව්‍ය ජාවාරම් මැඩපැවැත්වීම සඳහා නීතිය ක්‍රියාත්මක කිරීමේ ප්‍රමුඛතාව අඛණ්ඩ ව පවත්වාගෙන යා යුතු බවත් ඇය මෙහි දී අවධාරණය කළා ය.