හෙද නිලධාරීන් අද වර්ජනයේ

කරුණු කීපයක් මුල්කරගෙන ඌව පළාතේ පළාත් රෝහල් ඇතුළු සෞඛ්‍ය ආයතන 58 ක සේවකයෝ අද (26) උදෑසන සිට වැඩ වර්ජනයක් ආරම්භ කළහ.

අතිකාල දීමනා කපාහැරීම, උත්සව අත්තිකාරම් ප්‍රමාද කිරීම, ගමන් වියදම් කපා හැරීම, ගිලන් රථ සහායක අතිකාල කප්පාදුව යන කරුණු මුල් කරගනිමින් දියතලාව මූලික රෝහල හැර ඌව පළාත් සභාවට අයත් සෙසු සියලු පළාත් සෞඛ්‍ය ආයතනවල උපස්ථායක, කනිෂ්ඨ සේවක, විදුලි සෝපාන ක්‍රියාකරු, මැහුම් සේවිකා, අරක්කැමි, සෞඛ්‍ය කාර්ය සහායක ඇතුළු සේවක සේවිකාවන් 2,200 ක් පමණ මෙම වර්ජනයට එක්ව සිටියහ.

පළාතේ මූලික රෝහල් 05 ක්, දිසා රෝහල් 12 ක්, ප්‍රාදේශීය රෝහල් 14 ක් සහ සෞඛ්‍ය වෛද්‍ය නිලධාරී කාර්යාල 27 ක් මෙම වර්ජනයට එක්ව සිටි අතර සමස්ත ලංකා සුව සේවා සංගමයේ ඌව පළාත් ශාඛාව මඟින් මෙම වර්ජනය සංවිධානය කොට තිබිණි.

සිය ගැටලුවලට කඩිනම් විසඳුමක් ලබා නොදුණ හොත් ඉදිරියේදී දැඩි වෘත්තීය ක්‍රියාමාර්ගයකට එළඹෙන බව එම සංගමයේ ඌව පළාත් ලේකම් ටී.එම්.අසංක ඉන්දික මහතා පැවසීය.