හදිසි විදුලිය මිලදී ගැනීම දීර්ඝ කරයි - වියදම බිලියන 21යි

හදිසි විදුලිය මිලදි ගැනීම දීර්ඝ කිරීමට විදුලි  බල අමාත්‍යාංශය තීරණය කර තිබේ. ඒ සඳහා වන කැබිනට් පත්‍රිකාවට අමාත්‍ය මහින්ද අමරවිර මහතා අත්සන් තබා තිබේ.

“මම ඇමැතිවරයෙක් වශයෙන් අමාත්‍ය මණ්ඩල පත්‍රිකා රැසක්  අමාත්‍ය මණ්ඩලයට යොමු කර තිබෙනවා. එම පත්‍රිකාවලට මම අත්සන් කළේ ඉතාමත් සතුටෙන්. ඒ්වා සියල්ලම මහජනතාවට , රටට වැඩක් ඇති දේවල්. එහෙත් මම හිතේ ඇතිවෙච්ච දැඩි අසතුට හා කළකිරීම මත අත්සන් කරපු පළමුවැනි අමාත්‍ය මණ්ඩල පත්‍රිකාව තමයි විදුලිබලය හදිසි මිලදී ගැනීමේ යෝජනාව දීර්ඝ කිරීම සඳහා ඉදිරිපත් කළ අමාත්‍ය මණ්ඩල පත්‍රිකාව.

මාස හයකට විදුලිය හදිසි මිල දී ගැනීම් යටතේ අනුමැතිය ලබා දුන් අමාත්‍ය මණ්ඩල පත්‍රිකාව තවත් මාස හයකට දීර්ඝ කරන්න සිදු වුනා. ඒ් දැනට තිබෙන නියගය හේතුවෙන් ජලාශවල ජල මට්ටම පහළ යාම. දැන් ජල විදුලිය නිෂ්පාදනය සියයට 20කට තරම් පහතට වැටිලා. ඒ් නිසා ඒ් ගිවිසුම තවත් මාස හයකින් දිර්ඝ කරන්නට වුණා.

මේ සඳහා වැය වන මුදල රුපියල් බිලියන 21ක්. ඒ් කියන්නේ රුපියල් කෝටි 2100ක්. විදුලි ඒ්කකයක්  මිල දි ගන්න  රුපියල් 64ක් වැය කරන්න වෙනවා. රුපියල් 64ට ගත්ත විදුලි ඒ්කකය මහජනතාවට දෙන්නේ රුපියල් 16කට. තවත් පවුල් ලක්ෂ 17කට දෙන්නේ රුපියල්  2. 60කට.

පසුගිය ආණ්ඩුව කාළේ අඩු ගණනේ තවත් විදුලි බලාගාර දෙකක්වත් හැදුවා නම් මේ විදියට අහිංසක මහජනතාව වෙනුවෙන් වැය කරන්න තිබෙන මුදල් අපතේ යන්නේ නැහැ.  ලංකා විදුලි බල මණ්ඩලය දැන් වත් මෙම තත්ත්වය තේරුම් අරන් ඉදිරි බලාගාර ඉදි කිරීමට කටයුතු කරනවා නම් ඒ්ක සමස්ත ජාතියටම  කරන සේවාවක්” යැයි මහින්ද අමරවීර මහතා ප්‍රකාශ කළේය.