හෝටල් සේවකයාගේ මරණයට කොරෝනා එන්නතේ බලපෑමක් ඇත්දැයි සෙවීමට පරීක්ෂණ

ගාල්ල කරාපිටිය ශික්ෂණ රෝහලේ දී මියගිය හෝටල් සේවකයකුගේ මරණය සිදුවූයේ කොරෝනා එන්නත ලබාගැනීමෙන් පසු ඇතිවූ සංකූලතාවයක් හේතුවෙන්ද යන්න සොයාබැලීම සඳහා සිරුරු කොටස් වැඩිදුර පරීක්ෂණ සඳහා යොමුකළ බව කරාපිටිය ශික්ෂණ රෝහලේ අධිකරණ වෛද්‍ය නිලධාරී සමාධි දන්දෙණියආරච්චි මහත්මිය පවසයි.

මෙලෙස මියගොස් ඇත්තේ ඇඹිලිපිටියේ පදිංචි 40 හැවිරිදි එස්. ශ්‍රීමාල් නමැති අයෙකි.

ඔහු කොළඹ හෝටලයක සේවය කරන බැවින් දින 14කට පෙර කොරෝනා සඳහා ලබාදෙන ඔක්ස්‍ෆර්ඩ් ඇස්ට්‍රා සෙනිකා එන්නත ලබාගෙන තිබිණි.

එම එන්නත ලබාගත් දිනයේ පටන් අධික හිසරදය, උණ හා ඇඟපත වේදනාව තිබූ බැවින් හෙතෙම ඇඹිලිපිටිය රෝහලට ඇතුළත්වී ඇත.

ඔහුගේ රුධිර පට්ටිකා ප්‍රතිශතය ද සීඝ්‍රයෙන් පහත වැටීම නිසා ඩෙංගු රෝගය වැළඳි ඇත්දැයි ඇතිවූ සැකයක් හේතුවෙන් ඒ සඳහා ද පරීක්ෂණ සිදුකර ඇත. නමුත් ඩෙංගු සඳහා කරන ලද පරීක්ෂාකිරීම්වල දී තහවුරු වී ඇත්තේ ඔහුට ඩෙංගු රෝගය වැළදී නැති බවයි.

ඇඹිලිපිටියේ රෝහලේ දී ඔහු අසාධ්‍ය තත්ත්වයට පත්වීම හේතුවෙන් කරාපිටිය රෝහලේ දැඩි සත්කාර ඒකකයට පසුගිය 12 වැනි දා ඇතුළත් කර ඇති අතර 14 වැනි දා මියගියේය. ඔහුගේ දේහය සම්න්ධ පශ්චාත් මරණ පරීක්ෂණය පැවැත්වූ දන්දෙණියආරච්චි මහත්මිය පවසන්නේ මෙම පුද්ගලයාගේ මොළයේ ලේ ගැලීම් ද සිදුව තිබූ බවයි.

ලේ ගැලීම් මරණයට හේතුවක් විය හැකි වුව ද එම ලේ ගැලීම්වලට හේතුවූයේ කොරෝනා මර්දනය සඳහා ලබාදුන් එන්නතේ යම් සංකූලතාවයක් ද යන්න පරීක්ෂා කිරීම සඳහා සිරුරෙන් ලබාගත් පටක සාම්පල වෛද්‍ය පර්යේෂණායතනයට යොමුකිරීමට අධිකරණ වෛද්‍යවරියට කටයුතු කර තිබේ.

සිරංගිකා ලොකුකරවිට