සරණ ගුණවර්ධනට ඇප

රජයට පාඩුවක් සිදු කළේ යැයි අල්ලස් පනත යටතේ වරදකරු කර වසර තුනක සිරදඬුවම් නියම කෙරුණු හිටපු නියෝජ්‍ය අමාත්‍ය සරණ ගුණවර්ධන මහතා රුපියල් ලක්ෂ තුනක ශරීර ඇපයක් මත මුදා හරින ලෙස කොළඹ ප්‍රධාන මහේස්ත්‍රාත් ලංකා ජයරත්න මෙනවිය නියම කළේය.

මෙම නඩුව මෝසමක් මාර්ගයෙන් අද (07) කැඳවනු ලැබූ අවස්ථාවේදී  සරණ ගුණවර්ධන මහතා වෙනුවෙන් පෙනී සිටි ජනාධිපති නීතිඥ අනිල් සිල්වා මහතා අධිකරණය හමුවේ කරුණු දක්වමින් තම සේවාදායකයාට  නියම වී තිබෙන සිරදඬුවමට එරෙහිව ඔහු විසින් කොළඹ මහාධිකරණය හමුවේ අභියාචනයක් ගොනු කර ඇති බවත් එම අභියාචනය විභාග කර අවසන් තීන්දුවක් ලබා දෙන තුරු ඔහු ඇප මත මුදාහැරීමට නියෝග කරන ලෙස ඉල්ලා සිටියේය.

ඒ අනුව අදාළ අභියාචනය භාර ගත් කොළඹ ප්‍රධාන මහේස්ත්‍රාත් ලංකා ජයරත්න මෙනවිය සැකකාර සරණ ගුණවර්ධන මහතාට ඇප මත මුදා හැරීමට ද නියම කළේය.

සංවර්ධන ලොතරැයි මණ්ඩලයේ සභාපතිවරයා ලෙස කටයුතු කළ අවධියේ රජයට පාඩුවක් කළේයැයි ගොනුකර තිබූ චෝදනාවට වරදකරු කෙරුණු හිටපු නියෝජ්‍ය අමාත්‍යවරයෙකු වන සරණ ගුණවර්ධන මහතාට කොළඹ මහේස්ත්‍රාත් අධිකරණය විසින් බරපතළ වැඩ සහිත වසර 03ක සිරදඬුවම් නියම කර තිබුණි.