සංචාරක සංවර්ධන බද්ද ගෙවිමේ සහන කාලය දිර්ඝ කිරිමට තිරණයක් - ප්‍රසන්න

ශ්‍රී ලංකා සංචාරක  සංවර්ධන අධිකාරියේ ලියාපදංචි සංචාරක හෝටල් වලට සංචාරක සංවර්ධන බද්ද (TDL)  ගෙවීමට ලබාදී ඇති සහනය තවදුරටත් දීර්ඝ කිරීම කෙරෙහි කාර්මික අපනයන, ආයෝජන ප්‍රවර්ධන, සංචාරක හා සිවිල් ගුවන් සේවා ඇමති ප්‍රසන්න රණතුංග මහතාගේ අවධානය යොමු වි තිබේ.

කැබිනට් මණ්ඩලයේ අවධානය යොමු කර මේ සම්බන්ධයෙන් ඉදිරි පියවර ගන්නා බව ඇමති ප්‍රසන්න රණතුංග මහතා සඳහන් කරයි.

පසුගිය වසරේ අප්‍රේල් 21 වන දින පාස්කු ප්‍රහාරයෙන් පසුව ශ්‍රී ලංකා සංචාරක සංවර්ධන අධිකාරියේ  ලියාපදිංචි සංචාරක ආයතන වලින් අය කෙරෙන සංචාරක සංවර්ධන බද්ද ගෙවිම සදහා සහන කාලයක් ලබා දී තිබිණි. එම සහන කාලය මේ වසරේ ජුනි මාසයේ දි අවසන් වීමට නියමිතය.

සංචාරක ව්‍යාපාරයේ නිරත සංචාරක හෝටල් හිමියන්ගේ සංගමය ඇතුළු සංවිධාන 11ක නියෝජිතයන් සහ ඇමති ප්‍රසන්න රණතුංග මහතා අතර ඊයේ (07) පාර්ලිමේන්තුවේදී පැවති සාකච්ඡාවකදි ඔවුන් ඉල්ලා සිටියේ මේ  සහනය තවදුරටත් දීර්ඝ කරන ලෙසයි. පාස්කු ප්‍රහාරයෙන් පසුව බිද වැටී තිබු සංචාරක කර්මාන්තය මේ වනවිට යථා තත්ත්වයට පත්වෙමින් පැවතිය ද මෙම සහනය තවත් ටික කාලයකට හෝ ලබා දෙන්නේ නම් එය තමන්ට සහනයක් බව ඔවුහු මෙහිදි  පෙන්වා දුන්හ.

ඇමති ප්‍රසන්න රණතුංග මහතා මෙහිදි අවධාරණය කළේ මෙම සහන සැලසීමෙන් සංචාරක කර්මාන්තයට කිසියම් වාසියක් අත් වුයේදැ‘යි විමසා බැලිය යුතු බවය. මුදල් අමාත්‍යංශය හා කැබිනට් මණ්ඩලය ද සමග සාකච්ඡා කර ඒ සම්බන්ධයෙන්  ඉදිරියේ දි තීරණයක් ගන්නා බව ඇමතිවරයා මෙහිදි පැවසීය.

ලියාපදිංචි නොවු සංචාරක හෝටල් නිසා සංචාරක කර්මාන්තය මුහුණ පා ඇති තත්ත්වය පිළිබඳවත් මෙහිදි දීර්ඝ ලෙස සාකච්ඡා කෙරිණ. සංචාරක සංවර්ධන අධිකාරියේ ලියාපදිංචි නොකළ සංචාරක හෝටල් හා ලැගුම්හල් 20,000 ක් පමණ ඇති බවත් මේ නිසා විවිධ ගැටලු  මතු වි  තිබෙන බවත් මෙහිදි අනාවරණය විය.

ඇමති ප්‍රසන්න රණතුංග මහතා සදහන් කළේ මේ වනවිට මෙම හෝටල් හා ලැගුම්හල් ලියාපදිංචිය අනිවාර්ය කර ඇති බවයි. විශේෂ කණ්ඩායම් කිහිපයක් මේ සදහා යොදවා ඇති බවත් මාස 03ක් තුළ මෙම ලියාපදිංචි කීරිම් කටයුතු අවසන් කිරීමට අපේක්ෂා කරන බවත් ඇමතිවරයා පැවසීය.

සංචාරක කර්මාන්තය දියුණු කිරීමට ඉදිරි අයවැය තුලින් ක්‍රියාත්මක කළ යුතු යෝජනා ඉදිරිපත් කරන ලෙසද ඇමතිවරයා මෙම සංගම් නියෝජිතයන්ගෙන් ඉල්ලා සිටියේය. අමාත්‍යංශයදමෙසදහාදිගුකාලින,

මධ්‍යකාලින, කෙටිකාලින වශයෙන් යෝජනා හදුනාගෙන ඇති බවත් ක්ෂේත්‍රයේ නිරත වුවන්ගේ යෝජනා සදහා මෙහිදි ප්‍රමුඛතාවය ලබාදීමට අපේක්ෂා කරන බවත් ඇමතිවරයා මෙහිදි තවදුරටත් පෙන්වා දුන්නේය.