වනාතවිල්ලුව අරුවක්කාඩු කසළ අංගණයට විරෝධය

මේ වන විට ඉදිකරමින් පවතින වනාතවිල්ලුව, අරුවක්කාඩු කසළ අංගණයට විරෝධය පළකරමින් දහසකට අධික පිරිසක් අද (09දා) වැඩ අංගණයට කඩාවැදී විරෝධය දැක්වීම හේතුවෙන් එහි කටයුතු සම්පූර්ණයෙන්ම ඇනහිටව තිබූ බව වනාතවිල්ලුව පොලීසිය පවසයි.

විරෝධතා පුවරු ප්‍රදර්ශනය කරමින් හා සටන් පාඨ කියමින් වනාතවිල්ලුව, සේරක්කුලිය ගම්මානයේ සිට පාගමනින් පැමිණි විරෝධතාකරුවෝ අද (09දා) උදෑසන වනාතවිල්ලුව, අරුවක්කාඩු ප්‍රදේශයේ ඉදිකරමින් පවතින කසළ අංගණයට ඇතුළු වී විරෝධය දැක්වූහ.

මෙරට සියලුම හානිදායක කර්මාන්ත සියල්ල මේ වන විට පුත්තලම දිස්ත්‍රික්කයේ ස්ථාපිත කර තිබියදී, තවත් ඉදිකිරීම් සිදුකරන බව ඔවුහු පවසා සිටියහ.

විරෝධතාව පැවැත්වෙන අවස්ථාවේදී එහි ඉදිකිරීම් කටයුතු සිදුවෙමින් තිබුණද, ජනතාව දිගින් දිගටම ඝෝෂා කරමින් විරෝධතාවේ නිරත වීම හේතුවෙන් වැඩබිමේ සේවය කරමින් සිටි චීන ජාතිකයන් සියලු දෙනා යළි නවාතැන් වෙත රැගෙන යනු දැකගත හැකිවිය.

කෙසේ වුවද විරෝධතාව අඛණ්ඩව පැවැතීම හේතුවෙන් අදාළ වැඩබිමේ සියලු සේවකයන් එම ස්ථානයෙන් ඉවත් වූ අතර, යන්ත්‍ර සූත්‍රද වැඩබිම පරිශ්‍රයෙන් ඉවත් කෙරිණි.

පුත්තලම - හිරාන් ප්‍රියංකර ජයසිංහ