වීඩියෝව ගැන කරුගේ මාධ්‍ය ඒකකයෙන් ප්‍රකාශයක්

හිටපු කථානායක කරු ජයසූරිය මහතා පසුගිය මහ මැතිවරණ සමයෙහි සමගි ජන බලවේගයේ කොළඹ  දිස්ත‍්‍රික් අපේක්ෂකයෙක් ප‍්‍රවර්ධනය කිරීමට කටයුතු කිරීමක් පිළිබඳව අද දින මාධ්‍යන් හි පළව ඇති ප‍්‍රවෘත්ති සත්‍යයෙන් තොර බව ඔහුගේ මාධ්‍ය ඒකකය නිවේදනය කරයි.

කරු ජයසූරිය මහතා කථානායක ධුරයෙන් සමුගත් පසුව දෙදරා යමින් තිබූ එක්සත් ජාතික පක්ෂය සමගිකරවීමට විශාල උත්සාහයක් දැරූ බව ද නිවේදනය කරන මාධ්‍ය අංශය එම උත්සාහය නිෂ්ඵල වූ විට කිසිඳු පාර්ශවයකට සහාය නොදී මුළුමනින්ම   ස්වාධීනව සිටීමට ඔහු තීරණය කළ බවද සඳහන් කරයි.

සිය පාර්ශවයන්ගෙන් මැතිවරණයට තරඟ කරන ලෙස හා එසේ නැතහොත් ජාතික ලැයිස්තු අපේක්ෂකයෙකු ලෙස නම ඇතුළත් කරන ලෙස එක්සත් ජාතික පක්ෂයෙන් හා සමගි ජන බලවේගයෙන් ලැබුණු ඉල්ලීම්ද ඔහු ප්‍රතික්ෂේප කළ බවත් සිය බෑණනුවන් වූ නීතීඥ නවින් දිසානායක මහතාගේ මැතිවරණ ව්‍යාපාරයට  හෝ දේශපාලනිකව කිසිඳු ආකාරයකින් දායක නොවෙමින් සිය ස්වාධීනත්වය රැකගැනීමට ඔහු කටයුතු කළ බවද මාධ්‍ය අංශය පවසයි.

සමගි ජනබලවේගයේ අපේක්ෂකයෙකු වූ නීතීඥ එරන්ද වැලිඅංගේ මහතාගේ මැතිවරණ ව්‍යාපාරය ප‍්‍රවර්ධනය කිරීමට වීඩියෝ පටයකට කරු ජයසූරිය මහතා අදහස් දක්වා ඇති බවට වන සඳහනෙහි පදනම පිළිබඳව පැහැදිලි කරමින් එම මාධ්‍ය අංශය පවසන්නේ,

“ජාතික තරුණ සේවා සභාවේ සභාපතිවරයා ලෙස කටයුතු කළ නීතීඥ එරන්ද වැලිඅංගේ මහතා එම කාලය තුළ ශ‍්‍රී ලංකා පාර්ලිමේන්තුව සමඟ එක්ව යොවුන් පාර්ලිමේන්තු සංකල්පය සාර්ථකව ක‍්‍රියාත්මක කිරීමට කටයුතු කළ ආකාරය පිළිබඳව ප‍්‍රසාදයක් එවකට කථානායකවරයා තුළ තිබිණි. 2019 සැප්තැම්බර් 03වන දින කථානායකවරයා හමු වූ එරන්ද වැලිඅංගේ මහතා ඉදිරියේදී තමා පාර්ලිමේන්තු මැතිවරණයකට තරඟ කිරීමට අපේක්ෂවෙන් සිටින බැවින් තමා පිළිබඳ ඇගයීමක් සිදුකරන ලෙස කථානායකවරයා ගෙන් ඉල්ලා සිටින ලදි. එවකට එක්සත් ජාතික පක්ෂය කිසිඳු ආකාරයකින් දෙකඩ වී නොතිබූ අතර නීතීඥ එරන්ද වැලිඅංගේ මහතා හිටපු අග‍්‍රාමාත්‍ය රනිල් වික‍්‍රමසිංහ මහතාගේ සමීපතමයෙකු වශයෙන් කටයුතු කරමින් සිටියේය. එමෙන්ම ඒ වනවිට සමගි ජන බලවේගය නමින් දේශපාලන පක්ෂයක් බිහි වීම පිළිබඳව අදහසක්වත් පළව නොතිබිණි. සමගි ජන බලවේගය බිහි වූයේ ඉන් මාස ගණනාවකට පසුය.

කෙසේ වෙතත් එම අදහස් දැක්වීමේ දී පුද්ගලයෙකු ලෙස එරන්ද වැලිඅංගේ මහතා පිළිබඳව ස්වකීය අදහස ඒ මහතාගේ ඉල්ලීම පරිදි සුභපැතුමක් වශයෙන් ප‍්‍රකාශ කළ අතර දේශපාලන පක්ෂයක් පිළිබඳව කිසිඳු සඳහනක් සිදුකර නැත.” යනුවෙනි.